Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 418 Hüküm no: 548 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Pervane’nin evini Mümine bt. Muharrem ve eşi Murad b. Abdullah’a sattığı Medîne-i Hazret-i Ebî Eyyûb-i el-Ensârî mahallâtından Süleyman Subaşı mahallesi sâkinlerinden Belkıs bt. Pervâne nâm hâtun meclis-i şer‘-i hatîr-i lâzımü’t-tevkīrde ikrâr-ı âti’z-zikri tasdîka kendi tarafından asîl ve zevcesi Mümine bt. Muharrem tarafından vekîl olup hasm-ı câhid mahzarında nehc-i mu‘teber üzre vekâleti sâbite olan Murad b. Abdullah mahzarında bi tav‘ihâ ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Ahmed Beşe b. Mustafa ve bir tarafdan Helvacıbaşı Mehmed Çavuş vakfı ve bir tarafdan Çorbacı vakfı ve bir tarafdan tarîk-i âm ile mahdûd bir bâb tahtânî beyti ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi, cümle tevâbi‘ ve levâhıkı ile mezbûrân Murad ve zevcesi Mümine’ye fıddî nakd-i râyic fi’l-vakt altı bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, onlar dahi ale’l-iştirâki’s-seviy iştirâ ve tesellüm eylediklerinden sonra semen-i mezbûr altı bin akçeyi bi’t-tamâm ve’l-kemâl yedlerinden ahz ve kabz eyledim ba‘de’l-yevm zikr olunan menzil mezbûrân Murad ve Mümine’nin ale’l-iştirâki’s-seviy mülk-i müşterâları olmuşdur. Keyfe mâ yeşâ’ ve yahtâr mutasarrıf olsunlar dedikde mukırra-i mezbûre Belkıs’ın minvâl-i muharrer üzre cârî olan ikrârını el-mukarru lehü’l-merkūm Murad asâleten ve vekâleten vicâhen ve şifâhen tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî min Zilhicceti’l-harâm li sene seb‘a ve erba‘în ve elf. Şuhûdü’l-hâl: Hüseyin Efendi b. Mehmed el-İmâm, el-Hâc Receb b. Hamza, Ahmed Beşe b. Mustafa, Mehmed b. Abdullah, Bayram Halîfe b. ( ) el-Müezzin, Murad Beşe b. Abdullah, Yakub b. Kurd, Mahmud b. Ahmed ve gayruhüm.