Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 418 Hüküm no: 549 Orijinal metin no: [87a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mustafa’nın evini eşi Fâtıma bt. Abdülaziz’e sattığı Medîne-i Hazret-i Ebî Eyyûb el-Ensârî mahallâtından Davud Ağa mahallesi sâkinlerinden Ahmed b. Mustafa nâm kimesne mahfil-i kazâda mezbûr Ahmed’in zevcesi Fâtıma bt. Abdülaziz tarafından ikrâr-ı âti’z-zikri tasdîka vekîl olup vekâleti mezbûre Fâtıma’yı ma‘rifet-i şer‘iyye ile ârifeyn olan Selim Halîfe b. Veli ve Süleyman b. Mehmed şehâdetleri ile şer‘an sâbite olan Mehmed Çelebi b. Muharrem mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan ba‘zan Meryem Hâtun mülkü ve ba‘zan peremeci Ali mülkü ve bir tarafdan vakıf menzil ve bir tarafdan Davud Halîfe b. Mehmed mülkü ve bir tarafdan tarîk-i âm ile mahdûd üç bâb tahtânî beyti ve havluyu ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi, zevcem mezbûre Fâtıma’ya fıddî nakd-i râyic fi’l-vakt on iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra mezbûr on iki bin akçeyi bi’t-tamâm ve’l-kemâl zevcem mezbûre Fâtıma yedinden ahz ve kabz eyledim ba‘de’l-yevm zikr olunan menzil zevcem mezbûre Fâtıma’nın mülk-i müşterâsı olmuşdur. Keyfe mâ teşâ’ ve tahtâr mutasarrıfe olsun dedikde mukırr-ı mezbûr Ahmed’in minvâl-i muharrer üzre cârî olan ikrârını vekîl-i merkūm Mehmed Çelebi vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Şuhûdü’l-hâl: Davud Halîfe b. Mehmed, Mustafa b. Ahmed, Mahmud b. Ahmed, Yakub b. Kurd, Mustafa b. Mahmud, Ali b. Mustafa ve gayruhüm.