Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 419 Hüküm no: 550 Orijinal metin no: [87b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem b. Ahmed’in miras tarla hisselerini Peto v. Kalani’ye sattığı Vilâyet-i Rumeli’nde Premedi kazâsına tâbi‘ Uskorlaç nâm karyede sâkin iken bundan akdem vefât eden Pervâne’nin verâseti sulbî oğulları Mustafa ve Ahmed’e münhasıra olup kable’l-kısme mezbûr Ahmed dahi müteveffâ olup verâseti zevce-i metrûkesi Fâtıma’ya ve sulbî oğlu Rüstem’e ve sulbiye kızı Meryem’e münhasıra olup, kable’l-kısme mezbûre Fâtıma dahi müteveffât olup verâseti sadrî oğlu mezbûr Rüstem’e ve sadriye kızı mezbûre Meryem’e münhasıra olduğu şer‘an müte‘ayyin ve müteveffâ-yı mezbûr Pervâne’nin terekesinden olan emlâk-i âti’z-zikrin bi tarîki’l-münâsaha tashîh olunan kırk sekiz sehimden on altı sehmi mezbûr Rüstem’e ve yirmi dört sehmi mezbûr Mustafa’ya ve sekiz sehmi mezbûre Meryem’e isâbet eylediği mütebeyyin oldukdan sonra mezbûr Rüstem mahfil-i kazâda müteveffâ-yı mezbûr Pervâne’nin mülkü olup karye-i mezbûrede vâki‘ bir tarafdan Hasan b. Süleyman mülkü ve bir tarafdan Göka v. Kika mülkü ve bir tarafdan Peço v. Kalani mülkü ve bir tarafdan tarîk-i âm ile mahdûd üç bâb tahtânî beyti ve bir samanlığı ve kırk dip dut ve altı dip ceviz eşcârını hâvî bahçeyi müştemil menzilden ve menzil-i mezbûrun dâhilinde vâki‘ tahtadan çatma şırahâneden ve yine karye-i mezbûrede vâki‘ etrâf-ı erba‘ası Kika v. Göka ve Peto v. Kalani ve Peto v. Kika mülkleri ve tarîk-i âm ile mahdûd eşcâr-ı müsmireyi müştemil mülk bahçemden ve yine karye-i mezbûrede vâki‘ beynimizde ma‘lûmü’l-hudûd yedi kıt‘a mülk bağlardan bi tarîki’l-münâsaha bana intikāl eden on altı sehim hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile beş bin nakd-i râyic fi’l-vakt fıddî akçeye safka-i vâhide ile mezbûr Peto’ya bey‘, ol dahi iştirâ edip semen-i mezbûru yedinden tamâmen ahz ve kabz eyleyip mebî‘-i mezbûru mahallinde zabta taslît eyledim dedikde gıbbe’t-tasdîki’ş-şer‘î vicâhen mezbûr Rüstem i‘âde-i kelâm edip yine karye-i mezbûre arâzisinden olup mezbûr Mustafa ve Meryem ile ale’l-iştirâk tapu ile [mutasarrıf] olduğum ma‘lûmü’l-hudûd sekiz kıt‘a tarlalardan dahi hissemin hakk-ı tasarrufunu, sâhib-i arz ma‘rifetiyle bin beş yüz akçe bedel mukābelesinde merkūm Peto’ya tefvîz eyledim ol dahi tefevvuz ve kabûl eyledikden sonra bedel-i tefvîz olan meblağ-ı merkūm bin beş yüz akçeyi dahi yedinden bi’t-tamâm ahz ve kabz eyledim dedikde mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Yakub b. Kurd, Ali b. Mustafa, Mustafa b. Veli, Mahmud b. Ahmed, Mustafa Beşe Çukadâr.