Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 420 Hüküm no: 551 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın evini Mustafa Beşe’ye sattığı Vilâyet-i Rumeli’nde kasaba-i Göllükesri mahallâtından Ayandriya Dimitsek mahallesi sâkinlerinden Mehmed Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mustafa Beşe b. Mehmed mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan ba‘zan Toma v. Şaşko mülkü ve ba‘zan Mihal mülkü ve bir tarafdan ba‘zan Yako Yahudi vârisleri mülkü ve ba‘zan Rali sürücü mülkü ve ba‘zan Papa İstamo dâmâdı mülkü ve iki tarafdan tarîk-i âm ile mahdûd iki bâb fevkānî beyti ve altında ahırı ve bir tahtânî beyti ve sofayı ve dehlizi ve fırını ve bir çatma şırahâneyi ve hudûd-ı mezbûre dâhilinde zât-ı eşcâr-ı müsmire ve gayr-ı müsmire iki kıt‘a bahçeyi müştemil mülk menzilimi, cümle tevâbi‘ ve levâhıkı ile mezbûr Mustafa Beşe’ye fıddî nakd-i râyic fi’l-vakt beş yüz aded riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr beş yüz riyâlî guruşu mezbûr Mustafa Beşe yedinden bi’t-tamâm ve’l-kemâl ahz ve kabz edip mebî‘-i mezbûru mahallinde zabt ve tasarrufa müşterî-i mezbûr Mustafa Beşe’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Mustafa Beşe b. Veli, İsmail b. Mehmed, Murad Beşe b. Abdullah, Mehmed b. Abdullah, Osman b. Memi, Hasan Beşe b. Memi, Memi Ağa b. Abdullah ve gayruhüm.