Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 420 Hüküm no: 552 Orijinal metin no: [87b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın bazı mülklerini Koçi v. Mihal’e sattığı Vilâyet-i Rumeli’nde kasaba-i Göllükesri mahallâtından Ayandriya Dimitsek mahallesi sâkinlerinden Mehmed Bey b. Abdullah nâm kimesne mahfil-i kazâda işbu hâmilü’s-sifr Koçi v. Mihal nâm zimmî muvâcehesinde bi’t-tav‘i’s-sâf ikrâr ve i‘tirâf edip kasaba-i mezbûre kurbunda Dak Çayırı nâm mevzi‘de vâki‘ bir tarafdan Nuh bağı ve bir tarafdan zevcem Poço bt. Papa Mihal bağı ve bir tarafdan Ahî Baba bağı ve bir tarafdan tarîk-i âm ile mahdûd on iki [88a] çapalık bir dönüm bir kıt‘a mülk bağımı ve yine kasaba-i mezbûre kurbunda Şuşca nâm mevzi‘de vâki‘ bir tarafdan Papa Manol bağı ve bir tarafdan Dimitri bağı ve bir tarafdan Papa Milaki bağı ve bir tarafdan tarîk-i âm ile mahdûd altı çapalık buçuk dönüm bir kıt‘a mülk bağı ve bir tahta çatma şırahânemi ve dört büyük fıçıyı ve on beş vakıyye bir kazânı mezbûr Koçi’ye nakd-i râyic fi’l-vakt yüz aded riyâlî guruşa bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr yüz guruşu mezbûr Koçi yedinden tamâmen alıp kabz edip mebî‘ât-ı mezbûrâtı mahallinde kabz ve tasarrufa müşterî-i merkūm Koçi’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn. Tahrîren fi’l-yevmi’l-hâmis min Zilhicceti’ş-şerîfe li sene seb‘a ve erba‘în ve elf.