Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 426 Hüküm no: 561 Orijinal metin no: [89b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Derviş’in mutasarrıf olduğu zeametin bedelini ödediği Vilâyet-i Rumeli’nde kasaba-i Livadya sâkinlerinden Mehmed b. Derviş nâm kimesne meclis-i şer‘-i hatîr lâzımü’t-tevkīrde kazâ-i mezbûre tâbi‘ Lefte ve Kiryak karyeleri ve gayriden kırk yedi bin altı yüz yetmiş beş akçe ze‘âmete berât-ı pâdişâhî ile mutasarrıf olup âhar diyârda olan Mustafa Ağa tarafından her sene üzerine lâzım gelen bedelini verip temessükünü ahza vekîl olan vâlidesi fahrü’l-muhadderât Mümine Hâtun bt. Abdi Efendi tarafından ikrâr-ı âti’z-zikri tasdîka vekîl olup hasm-ı câhid mahzarında mezbûr Mümine Hâtun’u ma‘rifet-i şer‘iyye ile ârifeyn olan Mustafa b. Abdullah ve Siyavuş b. Abdullah şehâdetleri ile şer‘an vekâleti sâbite olan Mustafa Çelebi b. Hasan mahzarında ikrâr ve takrîr-i kelâm edip mezbûre Mümine Hâtun bin kırk yedi târihinde erbâb-ı timarın emr-i şerîf ile bedelleri cem‘ine memûr olan Hasan Bey’e mezbûr Mustafa Ağa’nın mutasarrıf olduğu ze‘âmeti bedelini ver ba‘dehû ben sana vereyim deyû bana emr etmeğin ben dahi ze‘âmet-i mezbûrenin bedeli için kırk yedi bin altı yüz yetmiş akçe ve temessük harcı için dahi beş bin akçe ki cem‘an elli iki bin altı yüz yetmiş beş akçe mezbûr Hasan Bey’e merkūme Mümine Hâtun’un emri ile def‘ ve teslîm eylemişidim hâlâ meblağ-ı mezbûru müvekkile-i mezbûre Mümine Hâtun bi’t-tamâm ve’l-kemâl ahz ve kabz eyleyip meblağ-ı mezbûra müte‘allik da‘vâdan zimmeti berî oldu dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini vekîl-i mezbûr Mustafa Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis aşer min Zilhicceti’l-harâm li sene seb‘a ve erba‘în ve elf. Şuhûdü’l-hâl: Mustafa Efendi el-Müderris, Ahmed Efendi el-Kadı, Fahrü’l-kuzât Abdi Efendi, tulû‘î Mustafa Çavuş, Mehmed Efendi, Süleyman Çavuş b. Mustafa Ağa ve gayruhüm.