Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 432 Hüküm no: 571 Orijinal metin no: [89(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza b. Hüseyin’in tarlalarının kullanım hakkını Mustafa Efendi b. Hasan’a devrettiği Vilâyet-i Anadolu’da Kuyucak nâm kasaba sâkinlerinden Hamza b. Hüseyin meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda, işbu bâ‘isü’l-kitâb Mustafa Efendi b. Hasan nâm kimesne muvâcehesinde ikrâr ve takrîr-i kelâm edip kasaba-i mezbûre kurbunda Nâibli nâm mevzi‘de vâki‘ bir tarafı Veli Sekban tarlası ve bir tarafı el-Hâc Mehmed tarlası ve bir tarafı Kosdakos tarlası ve bir tarafı tarîk-i âm ile mahdûd dokuz dönüm tarlanın hakk-ı tasarrufunu, sâhibü’l-arz ma‘rifetiyle mezbûr Mustafa Efendi’ye otuz aded riyâlî guruş mukābelesinde ferâğ ve tefvîz edip ol dahi tefevvuz ve kabûl edip bedel-i ferâğ olan otuz aded riyâlî guruş mezbûr Mustafa Efendi yedinden tamâmen ahz ve kabz eyledim dedikde mukırr-ı mezbûr[un] ikrârını mezbûr Mustafa Efendi vicâhen tasdîk ve şifâhen tahkīk etmeğin mâ vaka‘a gıbbe’t-taleb ketb olundu. Tahrîren fî evâili şehr-i Zilhicceti’l-harâm li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed, Mehmed b. Yusuf, Veli b. el-Hâc Mustafa, Mahmud b. Mustafa, Mehmed Efendi b. Osman, Mahmud b. Ahmed ve gayruhüm.