Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 433 Hüküm no: 574 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mafto bt. Varto’nun çayırını Kanko bt. Hristo’ya sattığı Vilâyet-i Rumeli’nde Çatalca kazâsına tâbi‘ Nuhur nâm karye sâkinlerinden Mafto bt. Varto nâm Nasrâniye tarafından tefvîz-i âti’z-zikri ikrâra vekîl olup hasm-ı şer‘î-i câhid mahzarında Dimo v. Yani ve diğer Dimo v. Niko nâm zimmîler şehâdetleri ile vekâleti sâbite olan Todori v. Niko nâm zimmî mahfil-i kazâda yine karye-i mezbûre sâkinelerinden işbu hâmiletü’s-sifr Kanko bt. Hristo nâm Nasrâniye tarafından dahi ikrâr-ı âti’z-zikri tasdîka vekîl olup vekâleti şâhidân-ı mezbûrân şehâdetleri ile şer‘an sâbite olan mezbûr Kanko’nun zevci Avyar[o] v. Yorgi nâm zimmî muvâcehesinde bi’l-vekâle ikrâr ve takrîr-i kelâm edip müvekkile-i mezbûre Mafto karye-i mezbûre hudûdu dâhilinde vâki‘ bir tarafdan Niko nâm zimmî çayırı ve bir tarafdan Yani nâm zimmî çayırı ve bir tarafdan tarîk-i âm ile mahdûd mutasarrıfe olduğu bir kıt‘a yoncalık ta‘bîr olunur çayırının hakk-ı tasarrufunu, sâhib-i arz ma‘rifetiyle mezbûre Kanko’ya bin nakd-i râyic fi’l-vakt fıddî akçe mukābelesinde tefvîz edip ol dahi minvâl-i muharrer üzre tefevvuz ve kabûl eyledikden sonra bedel-i tefvîz olan meblağ-ı mezbûr bin akçeyi yedinden bi’t-tamâm ve’l-kemâl ahz ve kabz eyledi dedikde vekîl-i mezbûr vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’l-hâmis aşer min Zilhicceti’l-harâm li sene seb‘a ve erba‘în ve elf. Şuhûdü’l-hâl: Mustafa b. Veli, Ahmed b. Bayram, Yakub b. Kurd, Yani v. Nikola, Nikola [v.] Minho, Minho [v.] Şiro, Yani [v.] Yorgi, Minho [v.] Kosta, Yani [v.] Dimo, Yani [v.] Yorgi, Dimo v. ( ), Franko v. ( ) ve gayruhüm.