Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 434 Hüküm no: 575 Orijinal metin no: [90a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Beşe’nin çıkarttıkları suyu yeriyle birlikte Ali Ağa b. Pervane’ye sattığı Havâss-ı Refî‘a kazâsı müzâfâtından Hasköy demekle ma‘rûfe olan karye mahallâtından Abdüsselâm mahallesinde sâkin Hüseyin Beşe b. Yusuf kendi cânibinden asâleten ve el-Hâc Davud b. Mehmed nâm kimesne tarafından dahi husûs-ı âti’z-zikri ikrâra vekîl olup hasm-ı câhid mahzarında Hasan b. Abdullah ve Mustafa b. Mehmed şehâdetleri işe şer‘an vekâleti sâbite oldukdan sonra vekâleten mahfil-i kazâda işbu râfi‘ü’l-kitâb fahrü’l-emâcid ve’l-a‘yân makbûlü’s-sudûr ve’l-erkân Ali Ağa b. Pervâne tarafından dahi ikrâr-ı âti’z-zikri tasdîka vekîl olup kezâlik hasm-ı câhid mahzarında nehc-i mu‘teber-i mer‘î üzre vekâleti sâbite olan Sefer Bey b. Murad mahzarında ikrâr-ı tâm ve takrîr-i kelâm edip merkūm Sultan Bayezid-i Veli -tâbe serâhû- evkāfı arâzisinden olup mezbûr Hacı Davud ile müşterek mutasarrıf olduğumuz karye-i mezbûrede vâki‘ ma‘lûmü’l-hudûd tarlamızda, kendi malımız ile mevâki‘-i adîdede hafr eylediğimiz âbârdan müctemi‘ olan bir çuvaldız mikdârı su için mecrâyı biz kendi malımızla zikr olunan tarlamızda taş ile tûlen üç yüz zirâ‘ binâ eylediğimiz lağımı içinde cârî olan suyu ile müşârün-ileyh Ali Ağa’ya târih-i kitâbdan altı ay mukaddem otuz beş kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semen-i mezbûr otuz beş kıt‘a guruşu yedinden bi’t-tamâm ahz ve kabz eyleyip yine zikr olunan tarladan lağım-ı mezbûr ile meşgūl olan mikdârı yerin dahi tasarrufunu sâhib-i arz ma‘rifetiyle beş kıt‘a riyâlî guruşa tefvîz edip ol dahi tefevvuz ve kabûl eyledikden sonra bedel-i tefvîz olan beş kıt‘a riyâlî guruşu dahi yedinden ahz ve kabz eyledikde mezbûr Hüseyin Beşe’nin asâleten ve vekâleten cârî ve sâdır olan ikrâr ve takrîri vekîl-i merkūm Sefer Bey vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’l-hâmis min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, el-Hâc İbrahim b. Abdullah, Mehmed Bey b. ( ) Suyolcu, Yakub Çelebi b. Kurd, Mustafa Çelebi b. Receb ve gayruhüm.