Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 435 Hüküm no: 577 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mirza’nın mülklerini Ali Ağa b. Osman’a sattığı Dârü’s-saltanati’l-aliyye Kostantıniyyetü’l-mahmiyye mahallâtından Arabacı Fîruz mahallesi sâkinlerinden Mehmed Bey b. Mirza meclis-i hatîr-i lâzımü’t-tevkīrde işbu bâ‘isü’l-kitâb kıdvetü’l-emâsil ve’l-akrân Ali Ağa b. Osman mahzarında ikrâr ve takrîr-i kelâm edip Havâss-ı Refî‘a kazâsı müzâfâtından Terkos nâhiyesine tâbi‘ Dursunköyü demekle ma‘rûf karyede vâki‘ bir tarafdan Kerime Hâtun bt. Mehmed mülkü ve bir tarafdan Hatice Hâtun bt. Hasan mülküne ve bir tarafdan tarîk-i âma müntehî bir fevkānî iki tahtânî ve sofayı ve anbarı ve fırını ve bi’r-i mâyı ve tavuk kümesini ve iki ahırı ve zât-ı eşcâr-ı müsmire ve gayr-ı müsmireyi hâvî ve muhavvatayı müştemil çiftlik ta‘bîr olunur mülk menzilimi ve çiftlik-i mezbûrda mevcûd olan bir çift su sığırı ve iki çift kara sığırı ve beş re’s kara sığır ineği ile bir tosunu ve menzil-i mezbûra muttasıl lede’l-ahâlî ma‘lûmü’l-hudûd eşcâr-ı müsmireyi hâvî harman yerini ve karye-i mesfûre bağları dâhilinde vâki‘ inde’l-ahâlî ve’l-cîrân ma‘lûmü’l-hudûd eşcâr-ı müsmire ve gayr-ı müsmireyi hâvî tahmînen altmış dönüm bir kıt‘a mülk bağımı cümle tevâbi‘ ve levâhıkı ile müşârün-ileyh mezbûr Ali Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz sekiz bin nakd-i râyic fi’l-vakt akçeye safka-i vâhide ile bey‘ ve teslîm edip ol dahi istîcâr ve kabûl eyledikden sonra semen-i mezbûr otuz sekiz bin akçeyi bi’t-tamâm ahz ve kabz eyledim dedikden sonra mezbûr Mehmed Bey yine i‘âde-i kelâm edip karye-i mezbûre sınırı dâhilinde vâki‘ inde’l-ahâlî ve’l-cîrân ma‘lûmü’l-hudûd tahmînen elli araba otluk hâsıl olur dokuz kıt‘a çayırımı ve tahmînen altmış müd tohum istî‘âb eder sekiz kıt‘a tarlalarımın hakk-ı tasarrufunu, sâhib-i arz ma‘rifetiyle mezbûr Ali Ağa’ya on bin akçe bedel mukābelesinde tefvîz edip ol dahi tefevvuz ve kabûl ettikden sonra mukābele-i tefevvuzda olan on bin nakd-i mezbûrü’n-na‘t akçeyi müşârün-ileyh Ali Ağa yedinden bi’t-tamâm ahz ve kabz eyledim ba‘de’l-yevm zikr olunan emlâk-i mezbûr Ali Ağa’nın mülk-i müşterâsı ve mârrü’z-zikr çayır ve tarla dahi mesfûrundur, sâir emsâli tasarrufu gibi mutasarrıf [olsun] dedikde mukırr-ı mezbûru minvâl-i muharrer üzre cârî olan ikrârını el-mukarru lehü’l-merkūm Ali Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâbi‘ aşer min şehri Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Ahmed Çelebi b. ( ) el-Müezzin, Murtaza Beşe b. ( ) er-Râcil, Mustafa Ağa b. ( ) el-Müteferrika, el-Hâc Ahmed Ağa b. ( ) el-Müteferrika, Mehmed Çavuş, Hüseyin Bey b. Mehmed el-Cündî, Yakub b. Kurd, Mustafa b. Ahmed ve gayruhüm.