Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 437 Hüküm no: 579 Orijinal metin no: [90b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Kadri’nin İshak Çelebi b. Veli’den ödünç aldığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Çavuş Kasım mahallesinde sâkin olan Ali Bey b. Kadri nâm kimesne meclis-i şer‘-i şerîf ve mahfil-i dîn-i münîfde -sânehallâhu te‘âlâ ani’t-tağyîr ve’t-tahrîf- hâzır olup hâmil-i hâze’l-kitâb İshak Çelebi b. Veli’ye üzerinde ve zimmetinde karz-ı şer‘î cihetinden râyicü’l-vakt beş bin akçe ve vasfı ve cinsi beynlerinde ma‘lûm, müşterâ-yı makbûz çuka bahâsından yedi yüz elli akçe olmak üzre cem‘an beş bin yedi yüz elli akçe lâzımü’l-edâ ve vâcibü’l-kazâ borcu olduğunu ikrâr ve i‘tirâf etti. Karz dışındaki meblağ zeylde mezkûr târihden bir sene tamâmına müecceldir. Vâki‘ ikrâr, dâyin-i mezbûr tarafından vicâhen ve şifâhen tasdîk edildi. Sonra Mustafa Halîfe b. İlyas nâm kimesne cemî‘-i meblağ-ı mezbûra îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâmis aşer min Zilhicce eş-şerîfe sene seb‘a ve erba‘în ve elf. Şuhûdü’l-hâl: Mahmud Çelebi b. Mustafa, fahrü’l-müderrisîn Ali Çelebi b. Mustafa, Mehmed b. Mahmud, Abdülkādir b. Mehmed, Hasan Beşe b. (…), Mahmud Kethüdâ, Mustafa b. Ahmed, Aydın Bey b. Mustafa, Yakub Çelebi b. Kurd ve gayruhüm.