Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 437 Hüküm no: 580 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Mustafa b. Abdullah’ın babasından kalan mal hususunda İstemad v. Yani ile sulh yaptığı Havâss-ı Refî‘a kazâsı müzâfâtından Buğaz nâm karye sâkinlerinden olup hâlâ şeref-i İslâm ile müşerref olan Mustafa b. Abdullah mahfil-i kazâda işbu bâ‘isü’l-kitâb İstemad v. Yani nâm zimmî muvâcehesinde ikrâr-ı tâm ve takrîr-i kelâm edip karye-i mezbûrede vâki‘ bir tarafdan Andriye v. Yorgi mülkü ve bir tarafdan Yorgi v. Yani mülkü ve bir tarafdan Batak v. Andriye ve bir tarafdan tarîk-i âm ile mahdûd iki bâb ulvî beyti ve sofayı ve altında ahırlı ve zât-ı eşcâr-ı müsmire muhavvatayı müştemil olan menzil, ben İslâm’a gelmeden mukaddem babam Yani nâm zimmîlerin bi hasebi’l-irsi’ş-şer‘î bana intikāl edip ben sagīr iken vâlidem Elena nâm Nasrâniye fuzûlen merkūm İstemad’a bey‘ etmişdir hâlâ ben bey‘-i mezbûru mucîz olmayıp menzil-i merkūmu da‘vâ ve taleb eylediğimde mezbûr İstemad menzil-i mezbûru sen on üç yaşında olup mahfil-i kazâda bülûğuna mu‘terif oldukdan sonra on altı bin akçeye bana bey‘ edip kabz-ı semen eyledik deyû isbât etmek sadedinde iken aramıza muslihûn tavassut edip husûs-ı mezbûre müte‘allik da‘vâdan benim ile altı bin nakd-i râyic fi’l-vakt fıddî akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı merkūm altı bin akçeyi yedinden bi’t-tamâm ve’l-kemâl ahz ve kabz eyleyip menzil-i mezbûra müte‘allik da‘vâdan mezbûr İstemad’ın ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm mazmûn-ı kitâba muhâlif bir tarîk ile benden bi’z-zât ve bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Fazlullah Halîfe b. ( ) el-Müezzin, es-Seyyid Mustafa b. Zeynelâbidin, es-Seyyid Abdülbâkī Çelebi b. es-Seyyid Hüseyin, Mahmud b. Ahmed, Hasan Çelebi b. Ahmed, İbrahim Çelebi b. Ahmed.