Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 438 Hüküm no: 581 Orijinal metin no: [91a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çatalca halkı vergilerini ödediği takdirde rencide edilmemeleri fermanı Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtassu bi mezîdi inâyeti’l-meliki’l-mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olucak ma‘lûm ola ki dârende-i fermân-ı hümâyûn nefs-i Çatalca ahâlîsi ordu-yı hümâyûnuma arzuhâl edip bunlar üzerlerine edâsı lâzım gelen avârız ve sâir tekâlîf a‘lâ ve evsat ve ednâ i‘tibâriyle tahammüllerine göre verip edâ eylemeğe râzılar iken hâlâ içlerinde sâkin mün‘im ve mütemevvil ba‘zı kimesneler mücerred bunları ta‘cîz için tahammüllerinden ziyâde teklîf edip hilâf-ı şer‘-i şerîf rencîde etmekden hâlî olmadıkların bildirip bu bâbda şeyhülislâmdan verilen fetvâ-yı şerîf mûcebince amel olunmak bâbında emr-i şerîfim recâ eyledikleri ecilden buyurdum ki hükm-i şerîfimle vardıklarında husûs-ı mezbûra mukayyed ve fetvâlarına nazar edip göresin, arz olunduğu üzre bunlar vâki‘ olan avârız ve sâir tekâlîf a‘lâ ve evsat ve ednâ i‘tibâriyle tahammüllerine göre verip edâ eylediklerinden sonra min ba‘d hilâf-ı şer‘-i şer‘ ve kānûn ol vechile rencîde ettirmeyesin eslemeyeni yazıp bildirip bu husûs için tekrâr şikâyet olunup emr-i âhar varmalı eylemeyesin şöyle bilesin alâmet-i şerîfe i‘timâd kılasın. Tahrîren fi’l-evâsıtı şehri Zilhicceti’ş-şerîfe li sene seb‘a ve erba‘în ve elf. Be makām-ı Üsküdar el-mahmiyye.