Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 438 Hüküm no: 582 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haslar kazasına ait fıçı vergisinin toplattırılması fermanı Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtassu bi mezîdi inâyeti’l-meliki’l-mu‘în mevlânâ Hâslar kadısı -zîdet fezâ’iluhu- ve kıdvetü’l-kuzât ve’l-hükkâm ma‘denü’l-fazli ve’l-kelâm ( ) kadıları -zîde fazluhümâ- tevkī‘-i refî‘-i hümâyûn vâsıl olucak ma‘lûm ola ki bi’l-fi‘l gümrük emîni iftihârü’l-emâcid ve’l-ekârim Ali -dâme mecduhû- südde-i sa‘âdetime arzuhâl sunup kadîmden olageldiği üzre taht-ı kazânızda vâki‘ olan fıçı resmini tarafından varan âdemisine cem‘ ve tahsîl ettirmek bâbında hükm-i hümâyûnum recâ eylediği ecilden kadîmden olageldiği üzre amel olunmak emrim olmuşdur buyurdum ki ( ) vusûl buldukda bu bâbda sâdır olan emrim üzre amel edip dahi taht-ı kazânızda vâki‘ hamr fıçılarından kadîmden olageldiği üzre fıçı resmini mûmâ-ileyhin varan âdemisine bi’t-tamâm cem‘ ve tahsîl ettirip min ba‘d kadîmden olagelene ve emr-i hümâyûnuma muhâlif kimesneye ta‘allül ve tereddüd ettirmeyesin şöyle bilesin alâmet-i şerîfe i‘timâd kılasın. Tahrîren fi’l-evâili şehri Cumâdelâhire li sene seb‘a ve erba‘în ve elf. Be makām-ı Kostantıniyye el-mahrûse.