Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 238 Hüküm no: 242 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Mehmed’in terekesi davasında anlaşma sağlandığı Mahmiye-i İstanbul’da el-Hâc Evhad mahallesinde sâkine iken bundan akdem fevt olan İsmihan bt. Mehmed nâm hâtunun verâseti zevci Mustafa Halîfe b. Yahya nâm kimesneye ve li ebeveyn kız karındaşı Âişe nâm hâtuna münhasıra olduğu şer‘an zâhir ve mütehakkik oldukdan sonra mezbûre Âişe meclis-i şer‘-i hatîr-i lâzımü’t-tevkīrde tereke-i müteveffât-ı mezbûra vâzı‘ü’l-yed olan zevci mezbûr Mustafa Halîfe mahzarında ikrâr ve takrîr-i kelâm edip kız karındaşım müteveffât-ı mezbûre İsmihan’ın mezbûr Mustafa Halîfe zimmetinde mütekarrir ve ma‘kūdun-aleyh olan bin beş yüz akçe mehr-i müecceli ve sâir terekesinden bi hasebi’l-irsi’ş-şer‘î ile bana âid olan hisse-i şer‘iyyemi mukaddemâ taleb ve da‘vâ eylediğimde beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip mezbûr Mustafa Halîfe ile beynimizde bin beş yüz akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin beş yüz akçeyi mezbûr Mustafa Halîfe yedinden ahz u kabz edip tereke-i müteveffât-ı mezbûra müte‘allika da‘vâdan mezbûrun zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire li sene seb‘a ve seb‘în ve elf. Şuhûdü’l-hâl: Mustafa Çavuş b. Abdullah, Mustafa Çelebi b. ( ), Ahmed Çavuş b. ( ) el-Mübâşir, Arslan Çavuş b. Ahmed.