Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 439 Hüküm no: 583 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermenilerin 1048 yılına ait maktularının toplanması fermanı Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtassu bi mezîdi inâyeti’l-meliki’l-mu‘în mevlânâ Hâslar kadısı -zîde fezâ’iluhû- ve mefâhirü’l-kuzât ve’l-hükkâm ma‘denü’l-fazli ve’l-kelâm Uzunköprü ve Baba-yı Atîk ve Bergos ve Malkara ve Çorlu kadılar -zîde fazluhüm- tevkī‘-i refî‘-i hümâyûn vâsıl olucak ma‘lûm ola ki hâlâ memâlik-i mahrûsemde vâki‘ perâkende Ermeni tâifesinin bin kırk sekiz senesine mahsûb olmak üzre maktû‘ları cem‘ine memûr olan kıdvetü’l-emâsil ve’l-akrân Sâlih -zîde kadruhû- Dersa‘âdet’ime mühürlü tezkire gönderip zikr olunan kadılıklarda sâkin olan etrâf ve eknâfdan ticâret için gelen Ermeni tâifesinin târih-i merkūma mahsûb olmak üzre uhdelerine edâsı lâzım gelen üçer yüz altmış akçe maktû‘ları cem‘ ve tahsîl ve dâhil-i hazîne olmak lâzım ve mühim olmağın ( ) -zîde kadruhûya- der-uhde olup vech-i meşrûh üzre cem‘ ve tahsîl ettirilmek bâbında emr-i şerîfim verilmek recâsına i‘lâm eylemeğin imdi vech-i meşrûh üzre kadîmden olageldiği üzre cem‘ ve tahsîl ettirilmek emr edip buyurdum ki hükm-i şerîfimle mezbûr -zîde kadruhû- vardıkda bu bâbda sâdır olan fermân-ı celîlü’l-kadrim üzre amel edip dahi tâife-i mezbûreden eğer perâkende ve eğer Medîne-i Münevvere ve eğer öte yaka Rûmî ve Mısırlı ve Karamanlı ve Vanlı ve Bitlisli ve Kefeli ve Niğdeli ve Çorlulu ve …? ve Solhalı ve Nemçe ve Boğdan ve Eflak ve sâir vilâyetlerden ticâret için gelen Ermeni tâifesinin vech-i meşrûh üzre târih-i merkūma mahsûb olmak üzre uhdelerine edâsı lâzım gelen üçer yüz altmış akçe maktû‘larını mîrî için mezbûr kuluma kadîmden olageldiği üzre cem‘ ve tahsîl ve kabz ve …? dahl ve …? kimesneye inâd ve muhâlefet ettirmeyesin ve tâife-i mezbûreden ba‘zıları müteferrik ve çavuş ve zu‘amâ ve erbâb-ı timar ve dergâh-ı mu‘allâm yeniçerileri ve âhar bölüğü halkı ve sâir askerî tâifesinden ve a‘yân-ı vilâyetden bu husûsu [zî]-kudret kimesnelerin evlerinde ve çiftliklerinde ve bahçelerinde sâkin olmağla üzerlerine edâsı lâzım gelen maktû‘ları vermekde ta‘allül ve nizâ‘ ettirmeyip kat‘â inâd ve muhâlefet ettirmeyip vech-i meşrûh ve hesâb-ı mezkûr üzre maktû‘larını âhar sebeb mâni‘ olmak isteyenleri men‘ ve def‘ edip men‘le memnû‘ olmayıp inâd ve muhâlefet edenleri isim ve dirlikleri ile yazıp Dersa‘âdet’ime arz ve i‘lâm edesiz ve mîrî için alınan altını ve guruşu Hazîne-i âmiremde alındığı üzre ve kānûn-ı kadîm muktezâsına iki akçe noksân aldırıp ziyâde aldırmayasın ve akçe alınmak lâzım geldikde sahîhü’l-ayâr ve tâmmü’l-vezn akçe aldırıp zinhâr züyûf ve kırkık akçe aldırmayasız ve elbette altın ve guruş alırız deyû te’addîden re‘âyâyı ol vechile ta‘cîz ettirmeyesin ammâ hîn-i cem‘ tamâm ihtimâm edip hilâf-ı şer‘ ve kānûn ve mugāyir-i emr-i hümâyûn te’addî ve tecâvüzden ziyâde hazer edesiz ictinâb ve ihtirâz edip ve malımın izâ‘atden ihtirâz edesiz şöyle bilesiz alâmet-i şerîfe i‘timâd edesiz. Tahrîren fi’l-yevmi’l-hâmis aşer min Cumâdelâhire li sene seb‘a ve erba‘în ve elf. Be makām-ı Kostantıniyye.