Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 441 Hüküm no: 585 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıkçıların peremecilerin işlerine müdahalelerinin engellenmesi fermanı Efdalü’l-kuzâti’l-müslimîn ekādî vülâti’l-muvahhidîn, me‘âdinü’l-fazli ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn el-muhtassûn bi mezîdi inâyeti’l-meliki’l-mu‘în İstanbul ve Galata ve Eyüb kadıları -zîdet fazluhüm- tevkī‘-i refî‘-i hümâyûn vâsıl olucak ma‘lûm ola ki mahrûse-i İstanbul’da vâki‘ peremeciler kethüdâsı olan Ali ve Hüseyin ve Süleyman ve hamlu? Hacı Ahmed nâm kimesneler südde-i sa‘âdetime gelip şöyle arzuhâl eylediler ki kadîmü’l-eyyâmdan beri Yemiş iskelesi’nden Eyyûb-i Ensârî’ye varınca pereme işleyegelip Yemiş iskelesi’nden yukarı kayıkçılar geçegelmiş değiller iken hâlâ kadîmden olıgelene muhâlif Boğaziçi’nde olan iskelelere yanaşıp peremecilerin kâr ü kisblerine mâni‘ olup mukaddemâ bunların ellerine hüccet-i şer‘iyye verilip men‘ olunmuş iken yine hüccet-i şer‘iyyeye muhâlif Boğaziçi’nde olan iskelelere yanaşıp kâr ü kisblerine mâni‘ olup te’addî eylediklerin bildirip kadîmden olageldiği üzre amel olunmak bâbında emr-i şerîfim recâ eyledikleri ecilden buyurdum ki ( ) vardıklarında bu bâbda her biriniz gereği gibi mukayyed olup ellerinde olan hüccet-i şer‘iyyelerine nazar edip göresin, arz olunduğu üzre ise ol bâbda muktezâ-yı şer‘-i kavîm hüccet-i şer‘iyyeleri mûcebince amel edip dahi kadîmden olagelene muhâlif Boğaz’dan içeri olan iskelelere kayıkçılar tâife getirtmeyip ve yanaşdırtmayıp men‘ ve def‘ eyleyesiz şer‘-i şerîfe ve hüccet-i şer‘iyyeye ve emr-i hümâyûnuma muhâlif kimesneye iş ettirmeyip eslemeyeni yazıp arz eyleyesiz şöyle bilesiz alâmet-i şerîfe i‘timâd kılasız. Tahrîren fî evâhiri şehri Cemâziyelevvel li sene seb‘a ve erba‘în ve elf. Be makām-ı Kostantıniyye el-mahrûse.