Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 443 Hüküm no: 587 Orijinal metin no: [92b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haslar kazasına bağlı Çorlu ve bağlı mukataaların toplanmasına Mehmed Odabaşı’nın görevlendirildiği Sebeb-i tahrîr-i kitâb-ı kalem ve mûcib-i tastîr-i hitâb-ı rakam oldur ki mahrûse-i İstanbul’da vâki‘ merhûm ve mağfûrun-leh Şehzâde Sultan Mehmed Hân -tâbe serâhû-’nun Câmi‘-i şerîfi evkāfından olup Hâslar kazâsına tâbi‘ Çorlu ve tevâbi‘i mukāta‘ası senede yüz yetmiş beş bin akçe iltizâm üzre bundan akdem Solak Oruc Bey uhdesinde iken mezbûr fevt olmağla işbu bâ‘isü’l-varaka Mehmed Odabaşı mukāta‘a-i mezbûreyi tâlib ve râgıb olduğu ecilden üslûb-ı sâbık senesi yüz yetmiş beş bin akçe iltizâm üzre işbu sene bin kırk yedide vâki‘ Mart evvelinden bin kırk sekizde müntehî felvari-i mezbûr tamâmına değin der-uhde ve iltizâm olunup bundan akdem sinîn-i mâziyede cârî olan mu‘tâd üzre a‘şâr-ı şer‘iyyesin ve rüsûm-ı örfiyyesin ve cürm-i cinâyetin ve mâl-ı gāib ve mâl-ı mefkūd ve yava ve kaçkın ve beytülmâl-i âmme ve hâssası ve resm-i tapu-yı zemîn ve bi’l-cümle kadîmü’l-eyyâmdan bu ana gelince cânib-i vakf-ı şerîfe mahsûl kayd olunup olagelen cüz’î ve küllî mahsûlâtın esnâ-i sâbikūn ne vech üzre yerli yerinden cem‘ ve tahsîl ahz ve kabz edegelmişler ise emîn-i mezbûr Mehmed Odabaşı ol minvâl üzre mukāta‘a-i merkūme malını cem‘ ve tahsîl ahz ve kabz zabt ve tasarruf etmesi için ve ber vech-i peşîn ahz ve kabz olunan ( ) akçesini sene-i mezbûre âhiri deynine mahsûb olmak üzre işbu hurûf ber sebîl-i temessük ketb olunup, yedine verildi. Tahrîren fî selhi L [Şevvâl] sene 1047. El-fakīr Mustafa el-Mütevellî.