Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 443 Hüküm no: 588 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Büyükçekmece’nin Engürye köyündeki mescidin tamir edilerek câmi yapılmasına izin verildiği Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtassu bi mezîdi’l-inâyeti’l-meliki’l-mu‘în, mevlânâ Hâslar kadısı -zîdet fezâ’iluhû- tevkī‘-i refî‘-i hümâyûn vâsıl olucak ma‘lûm ola ki ashâb-ı hayrâtdan dârende-i fermân-ı vâcibü’l-iz‘ân kıdvetü’l-emâcid ve’l-a‘yân Süleyman -zîde mecduhû- dergâh-ı mu‘allâma arz sunup kazâ-i mezbûre müzâfâtından Büyükçekmece’ye karîb Engürye nâm karye ahâlîsinin câmi‘e ihtiyâcları olup ve karye-i mezbûrede vâki‘ mescid-i şerîf câmi‘-i şerîf olmağa sâlih olmağla mûmâ-ileyh hasbeten lillâh-i te‘âlâ ve taleben li merzâtihî kendi malıyla câmi‘ etmek murâd etmekle izn-i hümâyûnum vermek recâ eylediği pâye-i serîr-i a‘lâya arz ve telhîs olundukda, izn-i hümâyûnum erzânî kılınmışdır buyurdum ki göresin mescid-i mezbûr câmi‘ olmağa sâlih ise ve mûmâ-ileyh kendi malıyla ta‘mîr eder ise eimme-i Hanefî -rıdvânullâhi te‘âlâ aleyhim ecma‘în- tecvîz gördükleri vech üzre vaz‘-ı minber ve ikāmet-i Cum‘a ve Iydeyn ettiresin şöyle bilesin alâmet-i şerîfe i‘timâd kılasın. Tahrîren fî evâhiri şehri Cumâdelâhire sene erba‘a ve erba‘în ve elf. Be makām-ı Kostantıniyye el-mahrûse.