Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 445 Hüküm no: 590 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çekmeceli İbrahim’in haslar mukataasına ait kuzu bacını toplamakla vazifeli olduğu Vasale fî 21 Şevvâl sene 1047. Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în, el-muhtassu bi mezîdi inâyeti’l-meliki’l-mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olucak ma‘lûm ola ki bi’l-fi‘l mahrûse-i İstanbul’da vâki‘ gümrük ve hâslar ve tevâbi‘i mukāta‘ası emîni olan kıdvetü’l-emâcid ve’l-ekârim Ali -zîde mecduhû- hâlâ südde-i sa‘âdetime memhûr tezkire gönderip taht-ı iltizâmımda olan mukāta‘âtdan İstanbul hâsları mukāta‘asının tevâbi‘inden olan kalyon mukāta‘ası bin kırk yedi Muharremü’l-harâmı’nın yirmisinden sene tamâmına değin yüz yirmi bin akçe olmak üzre kıdvetü’l-emâsil ve’l-akrân Çekmeceli İbrahim nâm kimesne -zîde kadruhû- der-uhde eden meblağ-ı mezbûru mezbûrdan bi’t-tamâm mîrî için alıp kabz edip kadîmden olagelen kazâ-i mezbûra tâbi‘ Kolyoz nâm karyede vâki‘ koyun ve kuzu geçdikde her elli kuzudan bir akçe ve her sürüden kırkar akçe ve füruht olan koyunlardan bir akçe alınmak üzre mühürlü ve damgalı ve mezbûrûn temessük mûcebince mezbûr İbrahim’e kadîmden <> olageldiği üzre zabt ettirilmek bâbında emr-i şerîfim verilmek recâsına i‘lâm etmeğin imdi müşârün-ileyhin verdiği temessük mûcebince zabt ettirilmek emr edip buyurdum ki hükm-i şerîfimle mezbûr İbrahim -zîde kadruhû- vardıkda, bu bâbda sâdır olan fermân-ı sa‘âdetim üzre amel edip dahi târih-i mezbûrda cem‘-i fey olunmak üzre kazâ-i mezbûrda vâki‘ kuzu bâcın olagelen âdet ve kānûn üzre mezbûra cem‘ ve tahsîl ettirip min ba‘d taraf-ı âhardan bir ferdi bir vechile müdâhale ettirmeyesin emr-i şerîfime muhâlif ve kadîmden olagelen âdet ve kānûna mugāyir kimesneye iş ettirmeyip vech-i meşrûh üzre olan emrimi yerine getiresin. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve erba‘în ve elf. Be makām-ı Kostantıniyye el-mahrûse.