Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 239 Hüküm no: 244 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hatun bt. Abdullah’ın, ölümünden sonra ev eşyalarını âzatlı câriyesi Gülbûy’a vasiyet ettiği Mahmiye-i Kostantıniyye hısnı ebvâbından Edirnekapısı dâhilinde Hatice Sultan mahallesi sâkinelerinden Emine Hâtun bt. Abdullah zâtı ma‘rifet-i şer‘iyye ile ârifân mahalle-i mezbûre imâmı Hasan Efendi b. Bayram ve müezzini Abdülkerim Hoca b. Ali nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bâ‘isü’l-kitâb Ahmed Çelebi b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip bi irâdeti’l-meliki’l-müte‘âl dâr-ı fenâdan dâr-ı bekāya intikāl ve irtihâl eylediğimde silk-i mülk-i sahîhimde münselike olan emlâkimden iki yüz dirhem sîmden masnû‘ bir raht kuşak ve bir takye ve entari zıbın ve bir kutnî entari ve bir al şal ve bir beyaz zıbın ve bir neftî ferâce ve bir ak kenarlı gömlek ve bir hamam rahtı ve dört bohça ve üç münakkaş makrama ve bir çarşaf ve bir makrama ve dokuz çarşaf ve iki sini ve iki peşkir ve bir ocak yaşmağı ve bir beledî döşek yüzü ve altı yemeni yorgan ve yüzüyle bir beledî döşek ve dört münakkaş yastık ve altı yemeni yastık ve üç minder ve orta Selânik keçesi ve iki Selânik yan keçesi ve bir köhne seccâde ve yedi fağfurî fincan ve bir sagīr kazan ve iki tencere ve bir baklava tepsisi ve üç kebîr sahan ve iki sagīr sahan ve bir kebîr bakır ibrik ve bir sagīr leğen ve bir sagīr ibrik ve iki keçe ve bir bakraç ve iki hamam tası ve bir keyl tütsü ve bir şamdan ve bir mikrâs ve bir havan ve iki tava ve iki sepet sandığı ve bir kebîr tahta sandığımı müdebberem olan Gülbûy bt. Abdullah’a verile deyû vasiyyet edip bu vasiyyetimin tenfîzine mezbûr Ahmed Çelebi’yi vasiyy-i muhtâr nasb ve ihtiyâr eyleyip ol dahi vesâyet-i mezbûreyi kabûl ve merâsimini edâya ta‘ahhüd eyledikden sonra eşyâ-i mezkûreyi mezbûr Ahmed Çelebi’ye def‘ ve teslîm eyleyip ol dahi tesellüm ve kabz eyledi dedikde mezbûr Ahmed Çelebi mukırre-i mezbûreyi cemî‘ kelimâtında vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelâhire li sene seb‘a ve seb‘în ve elf. Şuhûdü’l-hâl: Abdullah Efendi b. Ahmed Efendi el-İmâm, Hasan b. Bayram el-İmâm, Solak Hüseyin Çelebi b. Mehmed, es-Seyyid Mustafa Çelebi b. es-Seyyid Mahmud Çelebi.