Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 240 Hüküm no: 245 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun bt. el-Hâc Mustafa’nın câriyesi Müstakim’i âzat ettiği Mahmiye-i İstanbul’da Şahhuban mahallesi sâkinelerinden Âişe Hâtun bt. el-Hâc Mustafa’nın zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olan Mehmed Beşe b. Hasan ve İbrahim b. Yusuf nâm kimesneler şehâdetleriyle şer‘an sâbit olan Süleyman Çelebi b. Mustafa nâm kimesne meclis-i şer‘-i şerîf-i lâzımü’t-teşrîfde bi’l-vekâle ikrâr ve takrîr-i kelâm edip müvekkilem mezbûre Âişe kendiye rıkkıyyetini mu‘terife orta boylu, açık kara kaşlı, koyun elâ gözlü, Rûsiyyetü’l-asl bâ‘isetü’l-kitâb Müstakīm bt. Abdullah nâm câriye-i memlûkesini hasbeten lillâhi’l-azîmi’l-Hallâk malından tahrîr ve i‘tâk ve zümre-i harâir-i asliyyâta idrâc ve ilhâk eyledi min ba‘d mevsûfe-i mezbûre sâir harâir-i asliyyât gibi hürre olup üzerinde velâ-i şer‘îden gayrı müvekkilemin hakkı kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene seb‘a ve seb‘în ve elf. Şuhûdü’l-hâl: Hasan Efendi b. Mustafa el-İmâm, Hacı Mustafa b. el-Hâc Beşir, Mehmed Beşe b. Ali, Yusuf b. Abdullah.