Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 454 Hüküm no: 603 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahrünnisa Hatun b. Mustafa’nın tasarrufunda olan Bâli Hoca Vakfı’na ait evin keşfi Medîne-i Ebî Eyyûb el-Ensârî -radiye anhu Rabbühü’l-Bârî-mahallâtından Câmi‘-i Kebîr mahallesinde vâki‘ merhûm Bâli Hoca vakfı’ndan bir tarafı merhûm Abdülkādir Efendi vakfı ve bir tarafı Karabaş Muslihiddin Efendi vakfı ve bir tarafı tarîk-i âm ile mahdûd muhavvata-i dâhiliyyesi karşı-be-karşı iki bâb fevkānî odaları ve orta sofalı ve yan sofalarını ve dehlizi ve tahtânî iki bâb odayı ve sofayı ve bi’r-i mâyı ve tahtânî kenîfi ve muhavvata-i hâriciyyesi fevkānî bir bâb şâhnişînli odayı ve dehlizi ve altında ahırı ve fevkānî kenîfi müştemil menzile icâre-i mu‘accele ve müeccele ile mutasarrıfe olan bâ‘iset-i hâzihi’l-kitâb Fahrünnisâ Hâtun b. Mustafa tarafından âti’z-zikre vekîl olup hasm-ı câhid mahzarında nehc-i mu‘teber-i mer‘î üzre vekâleti sâbite olan Şaban Halîfe b. Kenan mahfil-i kazâya gelip bi’l-vekâle takrîr-i kelâm ve bast-ı merâm edip menzil-i mezbûr mürûr-ı eyyâm ve şuhûr ve kürûr-ı a‘vâm ve dühûr ile harâba müşrif olup kābil-i süknâ olmağla bazı mevâzi‘i meremmete ve ba‘zı mevâzi‘i tecdîd-i binâya muhtâc olmağın, müvekkile-i mezbûre eylediği meremmet vakfa teberru‘ ve müceddeden eylediği binâ mülkü olmak üzre mukaddemâ me’zûn olup, kendi malından binâ ve meremmet eylemişlerdi hâlâ üzerine varılıp harc ve sarf eylediği meblağın mertebe-i tahammülü keşf ve tahmîn-i sahîh ile tahmîn olunmak matlûbumdur dedikde mahkeme-i şerîfeden mevlânâ Abdülkādir Efendi b. Mehmed irsâl olunup ol dahi Hâssa mi‘mârlardan el-Hâc Hasan b. Mehmed ve vakf-ı mezbûrun mütevellîsi es-Seyyid Hüseyin Efendi b. Mahmud vekîl-i mezbûr ve zeyl-i kitâbda mastûrü’l-esâmî olan bî-garaz müslümanlar ile üzerine varıp mezbûre Fahrünnisâ Hâtun’un ettiği binâ ve meremmeti müşâhede ve mu‘âyene eylediklerinden sonra mi‘mâr-ı merkūm menzil-i mezbûrun evvelâ muhavvata-i dâhiliyyesinde vâki‘ müceddeden binâ olunan dolma duvarı mesâha eyledikde bennâ zirâ‘ı ile tûlen on bir buçuk ve arzen dört buçuk bi hesâb-ı şatrancî elli bir zirâ‘ dolma duvarın her bir zirâ‘ı ellişer akçeden iki bin beş yüz elli akçe ve müceddeden inşâ olunan musandıra bir dolabı ile ber vech-i maktû‘ bin yüz seksen iki akçe ve müceddeden vaz‘ olunan beş cam her biri yüz onar akçeden beş yüz elli ve merdiven başındaki dehlizin müceddeden binâ olunan tûlen on ve arzen sekiz bi hesâb-ı şatrancî seksen zirâ‘ döşemesi her bir zirâ‘ı yirmişer akçeden bin altı yüz akçe ve yine müceddeden binâ olunan tûlen yirmi iki ve arzen iki bi hesâb-ı şatrancî kırk dört zirâ‘ kafesin her bir zirâ‘ı otuzar akçeden bin üç yüz yirmi akçe ve kafes altında tûlen yirmi iki ve arzen buçuk bi hesâb-ı şatrancî on bir zirâ‘ perde ber vech-i maktû‘ iki yüz akçe ve müceddeden vaz‘ olunan büyük Rumeli ta‘bîr olunur dört kıt‘a taban direğinin her birisi yüzer akçeden dört yüz akçe ve yine iki direk başlığı ile iki yüz akçe ve yan sofası dibindeki odada müceddeden binâ olunan tûlen dokuz ve arzen yedi bi hesâb-ı şatrancî altmış üç zirâ‘ sıvanın her bir zirâ‘ı kırk beşer akçeden üç bin üç yüz elli akçe ve karşısındaki odanın dahi tûlen yedi ve arzen beş buçuk bi hesâb-ı şatrancî otuz sekiz zirâ‘ tavan ellişer akçeden bin dokuz yüz akçe müceddeden binâ olunan tûlen yedi buçuk ve kadden dört bi hesâb-ı şatrancî otuz zirâ‘ kerpiç duvarı her bir zirâ‘ı kırk beşer akçeden bin üç yüz elli akçe ve yine köşede müceddeden binâ olunan tûlen ve kadden iki bi hesâb-ı şatrancî altı zirâ‘ kerpiç duvarı dahi iki yüz yetmiş akçeye ve müceddeden ihdâs olunan merdiveni sahanı ile ber vech-i maktû‘ üç bin akçe ve oda ve döşemesinin tûlen yedi ve arzen üç buçuk bi hesâb-ı şatrancî yirmi dört zirâ‘ meremmâtı her bir zirâ‘ı on beşer akçeden üç yüz altmış akçe ve müceddeden ihdâs olunan tahtânî kenîfi ber vech-i maktû‘ üç bin akçe ve yan sofası döşemesinin tûlen beş ve arzen üç bi hesâb-ı şatrancî on beş zirâ‘ meremmâtı dahi on beşer akçeden iki yüz yirmi beş akçe ve def‘a bi hesâb-ı şatrancî on dört zirâ‘ döşeme meremmâtı yine on beşer akçeden iki yüz on akçe ve def‘a bi hesâb-ı şatrancî on zirâ‘ döşemenin meremmâtı on beşer akçeden yüz elli akçe ve ikisi içeride ve birisi taşrada on üç ocağın meremmâtına ber vech-i maktû‘ üç yüz altmış akçe ve muhavvata-i hâriciyyesinde vâki‘ şâhnişînli odada müceddeden vaz‘ olunan iki billur cam dört yüz elli akçe ve müceddeden binâ olunan dehlizin tûlen on dört buçuk ve arzen dört bi hesâb-ı şatrancî elli sekiz zirâ‘ döşemesinin her bir zirâ‘ı otuzar akçeden bin yedi yüz kırk akçe ve müceddeden ihdâs olunan fevkānî kenîf döşemesi sakfı ile ber vech-i maktû‘ üç bin üç yüz kırk akçe ve müceddeden vaz‘ olunan iki kanatlı sokak kapısı şatrancî altı zirâ‘ taş duvarı ile iki bin üç yüz akçe ve müceddeden vaz‘ olunan beş aded direk başlığı ile yedi yüz elli akçe ve yine müceddeden ihdâs olunan dizmenin doksan (…) aded cideri? tahtasının her birisi on dörder akçeden bin iki yüz altmış akçe ve müceddeden vaz‘ olunan merdiven sahnı ile ber vech-i maktû‘ üç bin akçe ve oda kapısı dibinde meremmet olunan tûlen sekiz ve arzen dört bi hesâb-ı şatrancî otuz iki zirâ‘ dolma duvar otuz beşer akçeden bin yüz yirmi akçe ve dehlizin tûlen dokuz ve arzen beş bi hesâb-ı şatrancî kırk beş zirâ‘ sakf meremmâtı her bir zirâ‘ı ikişer akçeden iki bin iki yüz elli akçe olup mezbûre Fahrünnisâ Hâtun’un menzil-i mezbûrun mücedded binâsına otuz üç bin beş yüz on iki akçe ve meremmâtına dahi dört bin altı yüz yetmiş beş akçe ki cem‘an otuz sekiz bin yüz seksen yedi akçe harc ve sarf eylediği mi‘mâr-ı merkūm ve sâir ehl-i vukūf mütevellî-i mezbûr muvâcehesinde tahmîn-i sahîh ile tahmîn ve kemâl-i ittifâk ile ittifâk ve ittihâd eylediklerini mevlânâ-yı mezbûr mahallinde tahrîr, ba‘dehû meclis-i şer‘a gelip inhâ ve takrîr etmeğin mâ hüve’l-vâki‘ gıbbe’t-taleb ketb olundu. Fî evâili Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Mustafa Çelebi b. Mehmed, Mustafa Çelebi. İlyas, Ali Beşe b. Osman, Mehmed Halîfe b. Ahmed el-Müezzin, Veli Halîfe b. İsa, Hüseyin Çelebi b. İsa, Ömer Halîfe b. Mehmed, Hasan Halîfe b. Mehmed, Mustafa (…).