Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 47 Hüküm no: 3 Orijinal metin no: [1a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Himmet b. Abdullah’ın Tanaş v. Yani’de kalan alacağının miktarının tespiti ve ödenmesine hükmedildiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Sofular mahallesinde sâkin iken bundan akdem fevt olan Himmet b. Abdullah nâm müteveffânın verâseti zevce-i metrûkesi Nâzenin bt. Abdullah nâm hâtuna ve sulbî sagīr oğlu Mustafa ve sagīre kızı Fâtıma ve kebîre kızı Meryem’e münhasıra olduğu şer‘an mütehakkik oldukdan sonra mezkûre Nâzenin Hâtun sagīrân-ı mesfûrânın kıbel-i şer‘-i kavîmden mansûbe vasîleri olmağla vesâyeten ve kebîre kızı Meryem tarafından husûs-ı âti’l-beyâna vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite oldukdan sonra vekâleten meclis-i şer‘-i hatîr-i lâzımü’t-tevkīrde çoban tâifesinden işbu hâmilü’l-kitâb Tanaş v. Yani nâm zimmîyi ihzâr ve muvâcehesinde üzerine da‘vâ ve takrîr-i kelâm edip zevcim müteveffâ-yı mezbûr Himmet hâl-i hayâtında ve kemâl-i sıhhatinde iken mezbûr Tanaş ile beynlerinde ilm-i şer‘î birle ma‘lûm bey‘ ve şirâ ve ahz u i‘tâ edip ba‘de vefâtihî huzûr-ı müslimînde hesâb olundukda ba‘de külli hesâb mezbûr Tanaş zimmetinde on beş bin cedîd ve ceyyid râyicü’l-vakt akçe zuhûr edip meblağ-ı mersûmu merkūm Tanaş i‘mâl etmek üzre bir sene tamâmına değin çuka bahâsından bin akçe olmak hesâbı üzre cem‘an zimmetinde on altı bin ceyyid ve cedîd akçe deyn mütekarrir olmuşdu hâlen merkūm Tanaş’dan suâl olunup alıverilmesi matlûbumdur dedikde gıbbe’s-suâl ve akībe’l-istintâk merkūm Tanaş cevâbında fi’l-hakīka müteveffâ-yı mezbûr Himmet ile hâl-i hayâtında iken bey‘ ve şirâ ve ahz u i‘tâ edip ba‘de vefâtihî huzûr-ı müslimînde hesâb olundukda ba‘de külli hesâb zimmetimde on beş bin cedîd akçe zuhûr edip lâzımü’l-edâ deynimdir deyip ziyâdeyi münkir olıcak mezbûr Nâzenin’den sıdk-ı makālini [mü]beyyine beyyine taleb olundukda udûl-i müslimînden Süleyman b. Ali ve Pîrî b. Abdülkādir nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Himmet’in vefâtından sonra bizim huzûrumuzda hesâb olundukda ba‘de külli hesâb mezbûr Tanaş zimmetinde on beş bin cedîd akçe zuhûr edip sene tamâmına değin çuka bahâsından bin akçe ki cem‘an on altı bin cedîd ve ceyyid râyicü’l-vakt akçe deyn mütekarrir olup bizi işhâd eyledi bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyet-i şerâiti’l-kabûl [1b ] merkūmânın şehâdetleri hayyiz-i kabûlde vâkı‘a oldukdan sonra mûcebiyle meblağ-ı mezbûrun edâsına hükm olunup bakkal tâifesinden Allahverdi Beşe b. Yakub nâm râcil meblağ-ı mezbûru emr-i kabûlü hâviye kefâlet ile kefîl olmağın mâ vaka‘a bi’t-taleb ketb olundu. Tahrîr[en] fi’l-yevmi’s-sâbi‘ ışrîn min şehri Rebî‘ilevvel sene erba‘a ve hamsîn ve elf. Şuhûdü’l-hâl: Mehmed b. Abdullah, Musli b. Hasan, Halil Çelebi b. Hüdâverdi, Abdurrahman Çelebi b. Mustafa el-Hammâmî ve gayruhüm mine’l-hâzırîn