Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 48 Hüküm no: 4 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Andreçabo’nun bağını Yani v. Mihal’e sattığı Vilâyet-i Rumeli’nde Delvine sancağında Mazaraki kazâsına tâbi‘ Şeboyha? nâm karye sâkinlerinden Yani v. Andreçabo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Mihal nâm zimmî muvâcehesinde bi’t-tav‘ ve’r-rızâ ikrâr-ı tâm ve bast-ı merâm edip karye-i mezbûre sınırı dâhilinde Eskibağlar demekle ma‘rûf mevzi‘de vâki‘ iki tarafdan yine müşterî-i mezbûr Yani bağına ve bir tarafdan Niko v. Yorgi bağına ve bir tarafdan Dimo v. Kamanoz bağına müntehî babam hâlik-i mezbûr Andreçabo’dan irs-i şer‘î ile benim hisse-i şer‘iyyeme isâbet etmekle mülk-i mevrûsum olup eşcâr-ı müsmire ve gayr-ı müsmireyi hâvî tahmînen beş çapalık bir kıt‘a mülk bağımı cümle tevâbi‘i ve levâhıkı ve âmme-i menâfi‘ ve merâfıkı ile merkūm Yani’ye iki bin ceyyid ve cedîd râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve tesellüm ettikden sonra semeni olan meblağ-ı mersûmu iki bin nakd-i mezbûrü’n-na‘t akçeyi merkūm Yani yedinden bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm mârrü’z-zikr bağ mersûm Yani’nin mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Yani bi’l-muvâcehe [tasdîk ve] bi’l-müşâfehe tahkīk edicek mâ hüve’l-vâki‘ gıbbe’l-ibtigā ketb ve imlâ olundu. Hurrire fi’l-yevmi’s-sâmin aşer min şehri Rebî‘ilevvel sene erba‘a ve hamsîn ve elf. Şuhûdü’l-hâl: Ali b. Mustafa, İbrahim b. Mustafa, Mustafa b. Mehmed, Musa b. ( ), Kini [v.] Lambak, İştati [v.] Yorgi, İştati [v.] Nikola, İştati [v.] Kini ve gayruhüm mine’l-hâzırîn