Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 49 Hüküm no: 5 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine Hâtun bt. Ali’nin vârisi olmadığı için muhallefâtının beytülmâle ait olduğu ve evinin müzayede ile Rahime Hâtun bt. Handan’a satıldığı Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasımpaşa mahallesinde sâkine iken bundan esbak vefât eden Sâkine Hâtun bt. Ali nâm müteveffânın zâhirde vâris-i ma‘rûfu olmayıp bi-haseb[i’ş-şer‘] ve’l-kānûn muhallefâtı beytülmâle âid olmağın vâki‘ olan beytülmâl hazret-i müşârün-ileyhin medîne-i mezbûrede vâki‘ câmi‘-i şerîf ve imâret-i âmireleri evkāfına bi’l-fi‘l mütevellî olanlara teslîm oluna deyû mukaddemâ hatt-ı hümâyûn-ı sa‘âdet-makrûn vârid ve nâzil olmağın ber mûceb-i fermân-ı şerîf müteveffât-ı mezkûrenin cümle muhallefâtına vâzı‘ü’l-yed olup vakf-ı mezbûra hâlen mütevellî olan fahrü’l-emâsil ve’l-a‘yân Hasan Ağa b. Emrullah meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızası zahrü’l-muhadderât Rahime Hâtun bt. Handan mahzarında bi’t-tav‘ ve’r-rızâ ikrâr ve takrîr-i kelâm edip muhallefât-ı mezkûre mahalle-i mezbûrede vâki‘ bir tarafı merhûm Mama Hâtun vakfı’na ve iki tarafdan Fâtıma Hâtun vakfı’na ve bir tarafdan tarîk-i âma müntehî fevkānî ve tahtânî dört bâb odayı ve kenîfi ve zât-ı eşcâr-ı müsmire muhavvatayı müştemil olan menzil sûk-ı sultânîde bey‘-i men yezîd olunup rağabât-ı nâs münkatı‘a oldukdan sonra mezbûre Rahime Hâtun üzerinde yirmi sekiz bin cedîd ve ceyyid râyic fi’l-vakt akçede karâr edip ziyâde ile tâlib-i âhar olmamağın menzil-i mahdûd-ı mezkûru hâlen tevliyyetim hasebiyle meblağ-ı mezbûra mesfûre Rahime Hâtun’a bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve kabz ve tesellüm ettikden sonra semeni olan meblağ-ı mersûm yirmi sekiz bin nakd-i mezbûrü’n-na‘t akçeyi tevliyyetim hasebiyle cânib-i vakf-ı mezbûr için merkūme Rahime Hâtun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mârrü’z-zikr merkūme Rahime Hâtun’un mülk-i müşterâ-yı sarîhidir keyfe mâ teşâ’ve hasbe mâ türîd mutasarrıfe olsun dedikde mütevellî-i mezbûrun [vech-i] muharrer üzre cârî ve sâdır olan ikrâr ve takrîrini el-mukarru lehü’l-mezbûre Rahime Hâtun bi’l-muvâcehe tasdîk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’t-tâsi‘ aşer min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Fahrü’l-eimme Alemüddin Efendi b. Mahmud, es-Seyyid Mustafa Efendi, Kur[d] Beşe b. Abdullah, Mehmed Çelebi b. Hüsrev el-Hallâk, Şaban Halîfe el-Müezzin, Ali Çelebi b. Handan el-Kâtib, Handan Bey b. Abdullah, Mehmed b. Abdullah, Hekimzâde İbrahim b. ( ) er-Râcil, Sefer Halîfe b. ( ) el-İmâm, Ali Çelebi b. ( ) el-Attâr