Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 50 Hüküm no: 6 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi b. Mehmed’in kendi tasarrufunda bulunan vakıf evin süknâsını Meryem Hanım bt. Mehmed’e îcâr ettiği Husûs-ı âti’l-beyânın mahallinde tahrîri iltimâs olundukda savb-ı şer‘den mevlânâ Hidâyetullah Efendi irsâl olunup ol dahi zeyl-i kitâbda mastûrü’l-esâmî olan müslimîn ile Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Veli Baba mahallesinde vâki‘ merhûm ve mağfûrun-leh el-Hâc Mahmud b. Ahmed el-Mahzenî nâm sâhib-i hayrın süknâsı evvelâ kendi nefsine ve ba‘dehû utekāsına ve evlâd ve evlâd ve evlâd-ı utekāsına ve ba‘de’l-inkırâz -el-iyâzü billâh min kahri’l-feyyâz- bir recül-i sâlihe vakf ve şart ve ta‘yîn edip iki tarafdan yine vakf-ı mezbûra ve bir tarafdan peştamâlî Ömer Bey mülküne ve bir tarafdan tarîk-i âma müntehî bir fevkānî ve bir tahtânî beyti ve müşterek bi’r-i mâyı ve cüneyneyi ve muhavvatayı müştemil menzile varıp akd-i meclis eylediklerinde evlâd-ı utekādan olup ber vech-i meşrûtiyyet vakf-ı mezbû[r]un mütevellîsi fahrü’l-akrân Mahmud Çelebi b. Mehmed meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızası fahrü’l-muhadderât ve zahrü’l-muvakkarât Meryem Hanım bt. el-merhûm Mehmed Paşa tarafından husûs-ı âti’l-beyânı tasdîke vekîl olup hasm-ı şer‘î-i câhid mahzarında mezbûrenin zâtını ma‘rifet-i şer‘iyye ile ârifân olan mefharü’l-hutebâ Mahmud Çelebi b. Mehmed ve Receb b. Mehmed şehâdetleriyle şer‘an vekâleti sâbite olan zevci kıdvetü’l-emâsil ve’l-akrân Mehmed Ağa b. Abdurrahman mahzarında ikrâr ve takrîr-i kelâm edip vakf-ı mezbûrun tevliyyetini ve menzil-i mahdûd-ı mezkûrun nevbet-i süknâsını ber mûceb-i şart-ı vâkıf bana intikāl ve isâbet etmeğin hâlen tevliyyetim hasebiyle menzil-i mezbûrun hakk-ı süknâsını müvekkil-i müşârün-ileyhâ Meryem Hanım beher şehr on beş akçeye ücret-i müeccele ve üç bin [akçe] icâre-i mu‘accele ile istîcâr ve kabûl ve ben dahi vech-i mübeyyen üzre îcâr ve teslîm eyledim ba‘de’l-yevm menzil-i mârrü’z-zikr müvekkil-i müşârün-ileyhâ Meryem Hanım’ın taht-ı icâresinde olup mülk-i müste’ceridir keyfe mâ teşâ’ve türîd mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî ihbâr etmeğin mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Fahrü’l-eimme Hüseyin Efendi Şerîfezâde, Mahmud Efendi b. Mehmed el-İmâm, el-Hâc Ahmed Beşe Çukadâr, Mehmed Çelebi b. Mehmed er-Râcil, Halil Çelebi b. Mehmed er-Râcil, Ahmed Çelebi b. Zülfikār, İsmail Bey b. Mehmed, Ali b. Mustafa, Receb Beşe b. Mehmed, İbrahim Çelebi b. Mustafa ve gayruhüm mine’l-hâzırîn