Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 51 Hüküm no: 7 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Süleyman ile zevci Mehmed b. es-Seyyid Mustafa’nın satın aldıkları evde eşit hisse ile ortak oldukları Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından merhûm Veli Baba mahallesinde sâkine Âişe Hâtun bt. Süleyman meclis-i şer‘-i hatîr-i lâzımü’t-tevkīrde zevci işbu hâmilü’l-kitâb es-Seyyid Mehmed b. es-Seyyid Mustafa mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ma‘an sâkin olduğumuz menzilin nısfı benim ve nısf-ı âharı zevcim mezbûr es-Seyyid Mehmed’in olmak üzre cedîd ve ceyyid râyicü’l-vakt dokuz bin akçeye iştirâ olunmuşdu, merkūm es-Seyyid Mehmed’den suâl olunup takrîri tahrîr ve bi-hasebi’ş-şer‘ icrâ-yı hak olunması matlûbumdur dedikde gıbbe’s-suâl ve akībe’l-istintâk merkūm es-Seyyid Mehmed cevâbında fi’l-hakīka menzil-i mezbûru vech-i mübeyyen üzre dokuz bin nakd-i mezbûrü’n-na‘t akçeye iştirâ edip ale’l-iştirâki’s-seviy mutasarrıflarız deyicek vâki‘ hâl mezbûre Âişe talebiyle ketb ve imlâ ve tahrîr ve inşâ olunup men lehü’t-taleb yedine vaz‘ olundu. Hurrire fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Keyvan b. Abdullah, İbrahim b. Abdülkerim, Bâli b. Derviş, İbrahim b. Abdi, İbrahim Çelebi b. Mustafa, Ali Beşe el-Muhzır ve gayruhüm mine’l-huzzâr