Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 52 Hüküm no: 8 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa b. Ali’nin vefât eden kardeşi Mustafa Beşe’den miras kalan evini Nesli Hâtun bt. Mehmed’e sattığı Vilâyet-i Rumeli’nde medîne-i Hezargrad sâkinlerinden olup bundan esbak medîne-i mezbûrede vefât eden Mustafa Beşe b. Ali nâm müteveffânın li ebeveyn karındaşı ve hasren vârisi olan Musa b. Ali nâm kimesne meclis-i şer‘-i hatîr-i lâzımü’t-tevkīrde mahmiye-i Kostantıniyye hısnı ebvâbından Yenikapı hâricinde Emânî Çelebi mahallesi sâkin[elerinden] işbu hâmiletü’l-kitâb zahrü’l-muvakkarât Nesli Hâtun bt. Mehmed mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafdan Ali b. Abdullah mülküne ve bir tarafdan Mahmud Çelebi b. ( ) mülküne ve bir tarafdan Mustafa Çelebi b. Çakır mülküne ve bir tarafdan tarîk-i âm ile müntehî üç bâb fevkānî odayı ve sofayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire hadîkayı müştemil olup karındaşım mezbûr Mustafa’dan irs-i şer‘î ile bana intikāl edip mülk-i mevrûsum olan menzili cümle tevâbi‘ ve levâhık ve âmme-i menâfi‘ ve merâfıkı ile mersûme Nesli Hâtun’a dokuz bin cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm ve ol dahi vech-i mübeyyen üzre iştirâ ve kabz ve tesellüm eyledikden sonra semeni olan meblağ-ı mersûm dokuz bin nakd-i mezbûrü’n-na‘t akçeyi merkūme Nesli Hâtun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr mezbûre Nesli Hâtun’un mülk-i müşterâ-yı sarîhidir keyfe mâ teşâ’ve tahtâr mutasarrıfe olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarretü lehü’l-mersûme Nesli Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb sebt ve imlâ ve tahrîr-i inşâ olunup men lehü’t-taleb yedine vaz‘ olundu. Hurrire fî selhi şehri Rebî‘ilevvel li sene erba‘a ve hamsîn ve elf. Şuhûdü’l-hâl: Fahrü’l-cünûd [ve]’l-cüyûş Ali Çavuş, Kıdvetü’l-eimme Hüseyin Efendi b. Veli, Mahmud Çelebi b. Hüseyin el-Müezzin, Mehmed Çelebi b. Yusuf el-Müezzin, Abdi Beşe b. Sinan, Pîrî Çelebi b. Kaya, Şeyh Mehmed Çelebi b. ( ) er-Râcil, çiftçi İbrahim Beşe er-Râcil, Bayram b. Abdullah, Mehmed b. Hasan ve gayruhüm mine’l-huzzâr