Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 240 Hüküm no: 246 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zamâne bt. Abdullah’ın evinin yarısını kocası Receb b. Ali’ye borcuna karşılık takas yoluyla sattığı Mahmiye-i İstanbul’da Küçükpazar kurbunda Hâcce Hâtun mahallesinde sâkine Zamâne bt. Abdullah nâm hâtun meclis-i şer‘-i hatîrde zevci işbu bâ‘isü’l-kitâb Receb b. Ali nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Terzi Mehmed mülkü ve bir tarafdan Hammâmî Hâtun mülkü ve bir tarafdan ( ) mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir su kuyusunu ve bir kenîf ve cüneyneyi müştemil menzilimin nısfını merkūm Receb’e tarafeynden îcâb ve kabûlü hâvî bey‘-i bâtt-ı sahîh-i şer‘le on beş bin akçeye bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezkûr on beş bin akçeyi merkūm Receb cihet-i deyn-i şer‘îden deynim olan on beş bin akçeye takās ol dahi mukāssa ve kabûl eyledi, ba‘de’l-yevm vech-i muharrer üzre menzil-i mahdûd-ı mezbûrun nısfı merkūm Receb’in mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire li sene seb‘a ve seb‘în ve elf. Şuhûdü’l-hâl: Ahmed Efendi b. Şaban el-İmâm, Mehmed Efendi b. İbrahim el-İmâm, Fazlı b. Mustafa, Ahmed b. Kadri, Mustafa b. Abdullah, Mehmed b. Sefer, Mehmed b. Mustafa, Osman el-Hallâc, Yusuf b. Mehmed, Veli b. Ebûbekir.