Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 53 Hüküm no: 10 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem Hâtun bt. Mehmed’in boşandığı zevci Hüseyin Beşe b. Cihân’dan talep ettiği alacak için sulh oldukları Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Veli Baba mahallesinde sâkine Meryem Hâtun bt. Mehmed meclis-i şer‘-i hatîr-i lâzımü’t-tevkīrde zevc-i mutallıkı işbu hâmilü’l-kitâb Hüseyin Beşe b. Cihân nâm râcil mahzarında bi’t-tav‘i’s-sâf ikrâr ve takrîr-i kelâm edip târih-i kitâbdan beş sene mukaddem iz[di]vâcımız zamânında bir menzilde sâkin iken mezbûr Hüseyin Beşe’ye bi-tarîki’l-karz altı bin kâsid akçe verip meblağ-ı mezbûr zimmetinde olmağla mezbûr da‘vâ ve taleb edip merkūm Hüseyin Paşa dahi inkâr etmekle ben dahi isbâtdan âciz olmağın beynimizde münâza‘ât-ı kesîre ve muhâsamât-ı ekîde olmuşdu, el-hâletü hâzihî beynimize muslihûn ve müslimûn tavassut edip es-sulhu seyyidü’l-ahkâm fehvâsıyla sekiz yüz cedîd ve ceyyid râyic fi’l-vakt akçe üzerine beni inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mersûm sekiz yüz nakd-i mezbûrü’n-na‘t akçeyi merkūm Hüseyin Beşe yedinden bi’t-tamâm ve’l-kemâl ahz u kabz edip husûs-ı mezbûra müte‘allik da‘vâdan zimmetini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ederse lede’l-hükkâm mesmû‘a ve makbûle olmaya dedikde mukırra-i müdde‘iye-i mezbûre Meryem Hâtun’un vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Hüseyin Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb sebt ve imlâ olundu. Hurrire fi’l-yevmi’s-sâdis ve’l-ışrîn [min şehri Rebî‘ilevvel] li sene erba‘a ve hamsîn ve elf. Şuhûdü’l-hâl: Hızır Beşe b. Halil er-Râcil, Ahmed Beşe Çukadâr, Ahmed Beşe b. Receb, Mustafa Beşe b. Mehmed el-Muhtesib, Süleyman b. Turgud ve gayruhüm mine’l-huzzâr