Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 54 Hüküm no: 11 Orijinal metin no: [3a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hâtun bt. Mehmed ile zevci Mehmed b. Davud’un muhâlaa ile boşandıkları Havâss-ı Refî‘a müzâfâtından Cendereci karyesinde sâkine Sitti Hâtun bt. Mehmed nâm hâtun -tağyîr ve tahrîfden korunmuş olan- meclis-i şer‘-i şerîf ve mahfil-i dîn-i münîfde ikrâr ve i‘tirâf edip hâmil-i hâze’l-kitâb zevci Mehmed b. Davud nâm kimesne ile muhâla‘a oldukda ol dahi onunla nikâhlarında ma‘kūdun aleyh olan kadri ve nisâbı bin yüz dirhem fıddî cedîd ceyyid râyic fi’l-vakt mehr-i müecceli ile nafaka-i iddeti üzerine ve me’ûnet-i süknâsı kendi üzerine olmak üzre muhâla‘a-i sahîha-i şer‘iyye ile muhâla‘a oldukda akd-i cedîd ve sadâk-ı müste’nef olmaksızın kendisine helâl olmamak üzre bâyin oldukdan sonra her biri âharın zimmetini hukūk-ı zevciyyete müte‘allika olan cemî‘ de‘âvîden ibrâ-i âmm-ı kātı‘ü’n li’n-nizâ‘ ve râfi‘ün li’l-husûmet ile ibrâ ettiler. Cerâ zâlike ve hurrire fi’l-yevmi’s-sâdis ve’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Hüseyin b. Mehmed, el-Hâc Ahmed b. Mehmed Çukadâr, Sefer b. Hasan, Süleyman b. Abdullah, Ali Beşe el-Muhzır, İbrahim Çelebi el-Muhzır, Süleyman el-Muhzır ve gayruhüm mine’l-huzzâr