Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 55 Hüküm no: 13 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keraçşo bt. Yani’nin değirmen hisselerinin Todoş v. Andriye’ye satıldığı Vilâyet-i Rumeli’nde kazâ-i Yenişehir müzâfâtından Fener nâhiyesine tâbi‘ Ferhise? nâm karyede sâkine Keraçşo bt. Yani nâm Nasrâniyye tarafından bey‘ ve kabz-ı semene vekîl olup hasm-ı şer‘î-i câhid mahzarında Yorgi v. Armağan ve Hristodoli v. İstefan şehâdetleri ile şer‘an vekâleti sâbite olan sadrî oğlu Hristodoli v. Maneto nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Todoş v. Andriye nâm zimmî muvâcehesinde bi’l-vekâle ikrâr ve takrîr-i kelâm edip müvekkilem ve vâlidem mezbûre Keraçşo’nun silk-i mülk-i sahîhinde münselik olan emlâkinden Pejola nâm karye kurbunda vâki‘ lede’l-ahâlî ma‘lûmü’l-hudûd bir göz mülk buğday değirmeninden ve ona karîb inde’l-cîrân ma‘lûmü’l- hudûd bir göz kepe değirmeninden nısf hisse-i şer‘iyye-i şâyi‘asını cümle tevâbi‘ ve levâhıkı ve âmme-i menâfi‘ ve merâfıkı ile merkūm Todoş’a altı bin üç yüz cedîd ve ceyyid râyic fi’l-vakt akçeye bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eyledim ba‘de’l-yevm zikr olunan iki göz değirmenden nısf hisse-i şer‘iyye-i şâyi‘ası merkūm Todoş’un mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre asâleten [ve] vekâleten cârî ve sâdır [olan] ikrâr ve takrîrini el-mukarru lehü’l-mezbûr Todoş bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu ve tahrîr-i inşâ olundu. Hurrire fi’l-yevmi’s-sâbi‘ ve’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Musa b. Mehmed, Mustafa Çelebi b. ( ), İbrahim Çelebi b. Mustafa, Süleyman b. Turgud, İsteryano v. Dimo, Dimo v. Andoni, Tanaş v. Dimo, İstemad v. Todori ve gayruhüm mine’l-huzzâr