Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 56 Hüküm no: 14 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Arslan Paşa’nın Hüseyin Ağa b. Abdüddâim’e deyni olduğu [Derkenâr:] Hüseyin Ağa’nın hüccetidir. Vilâyet-i Rumeli’nde bi’l-fi‘l livâ-i İlbasan beyi olan umdetü’l-ümerâi’l-kirâm zübdetü’l-küberâ’i’l-fihâm Mustafa Bey b. el-merhûm Arslan Paşa meclis-i şer‘-i şerîf-i lâzımü’t-tevkīr ve’t-teşrîfde bundan akdem hıdemât-ı sultâniyyeden yeniçeri kethüdâ beyliği hizmetinden mütekā‘id olan işbu hâfızü’l-kitâb fahrü’l-a‘yân ve’l-ekârim zahrü’l-efâhim ve’l-e‘âzım Hüseyin Ağa b. Abdüddâim taraflarından ikrâr-ı âti’z-zikri tasdîke vekîl olup vekâleti el-Hâc Mehmed b. Abdullah ve Ali Çelebi b. Abdullah şehâdetleriyle sâbite olan fahrü’l-a‘yân Ahmed Beşe b. Abdülmennân mahzarında bi’t-tav‘i’s-sâf ikrâr ve i‘tirâf edip târih-i kitâb senesi Muharremü’l-harâm gurresinde merkūm Hüseyin Ağa yedinden bi-tarîki’l-karzi’ş-şer‘î bin üç yüz kıt‘a tâmmü’l-vezn ve sahîhü’l-ayâr râyic fî cemî‘i’l-bilâd ve’l-emsâr riyâlî guruş ahz u kabz edip ve yine târih-i mezbûre Muharremi gurresinden sene tamâmına değin müeccel ve mev‘ûd iki yüz mezbûrü’n-na‘t kıt‘a riyâlî guruş dahi beynimizde ilm-i şer‘î ile ma‘lûm iştirâ ve kabz eylediğim çuka bahâsından ki cem‘an bin beş yüz kıt‘a riyâlî guruş merkūm Hüseyin Ağa’ya zimmetimde lâzımü’l-edâ ve vâcib[ü’l-kazâ] deynimdir dedikde mukırr-ı mezbûr Mustafa Bey’i ikrâr-ı muharrer ve meşrûhunda merkūm Ahmed Beşe bi’l-muvâcehe tasdîk ve bi’l-müşâfehe tahkīk eylemeğin işbu hurûf gıbbe’t-taleb ketb ve terkīm olundu. Tahrîren fi’l-yevmi’s-sâmin ve’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Aydın Çavuş b. Malkoç, Hüseyin Çavuş b. Âşiyâbî, Mustafa Subaşı b. Mehmed, Mustafa b. Sinan el-İmâm, Osman Çavuş b. Hamza Çavuş, İbrahim Ağa b. Çorbacı, Kasım Beşe b. İlyas er-Râcil ve gayruhüm mine’l-hâzırîn