Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 56 Hüküm no: 15 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fıtık hastası olan Kosta v. Kosta’nın Zagori v. Dimo tarafından tedavi edileceği Vilâyet-i Rumeli’nde İpsala kazâsına tâbi‘ Ahırköyü demekle ma‘rûf karyede sâkin Kosta v. Kosta nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Zagori v. Dimo nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip hâlen ben -Allahümme âfinâ- maraz-ı fıtığa mübtelâ olmağla mezbûr Zagori zimmî maraz-ı mezbûru ücret ile timar eylemek üzre tarafından ahd ve mîsâk olundu ki eğer mezbûr Zagori zikr olunan marazıma timar ederken ecel-i mukadderim yetişip maraz-ı mezbûrun mu‘âlecesinden nâşî zahmetinden mürd olursam vârislerim mezkûr Zagori’den dem ve diyetim taleb ve da‘vâ eylemesinler dedikde işbu vesîka-i enîka bi’t-taleb ketb olundu. Tahrîren fi’l-yevmi’s-sâmin aşer min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Mustafa, Bayram el-Muhzır, Baba Süleyman el-Muhzır ve gayruhüm mine’l-huzzâr