Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 57 Hüküm no: 16 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Kosta’nın bostan ve harman yerini Yani v. Nikola’ya sattığı Vilâyet-i Rumeli’nde İnebahtı sancağında Badracık kazâsına tâbi‘ Nahor nâm karye sâkinlerinden Todori v. Kosta nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Nikola nâm zimmî muvâcehesinde bi’t-tav‘ ve’r-rızâ ikrâr ve i‘tirâf [edip] karye-i mezbûre sınırı dâhilinde vâki‘ bir tarafdan Yani v. Çoni mülkü ve bir tarafdan Zografo v. Dimo mülkü ve bir tarafdan Minho v. Papa mülkü ve bir tarafdan tarîk-i âma müntehî mülküm olan bir kıt‘a harman ve bostan yerini cümle tevâbi‘ ve levâhıkı ve âmme-i menâfi‘ ve merâfıkı ile merkūm Yani’ye iki bin elli cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve kabz ve tesellüm ettikden sonra semeni olan meblağ-ı mersûm iki bin elli nakd-i mezbûrü’n-na‘t akçeyi mezbûr Yani yedinden bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm mârrü’z-zikr harman ve bostan yeri mesfûr Yani’nin mülk-i müşterâsıdır keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ ve tahrîr-i inşâ olundu. Hurrire fi’l-yevmi’t-tâsi‘ aşer min şehri Rebî‘ilevvel li sene erba‘a ve hamsîn ve elf min hicreti men lehü’l-izzü ve’ş-şeref. Şuhûdü’l-hâl: Ali b. Mustafa, Mustafa b. Mehmed, Süleyman b. Turgud, Musa b. Abdullah, Todori v. Minho, Todori v. Yani, Dimo v. Papa, Tulî Papa ve gayruhüm mine’l-huzzâr.