Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 57 Hüküm no: 17 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Mihal’in menzilini Yorgi v. Yani’ye sattığı Vilâyet-i Rumeli’nde kazâ-i Yenişehir müzâfâtından Kuhistân nâhiyesine tâbi‘ Büyük Kerasova nâm karye sâkinlerinden Yorgi v. Mihal nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Yorgi v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkinden karye-i mezbûrede vâki‘ bir tarafdan Yorgi v. Şirmata mülküne ve bir tarafdan Dimitri v. Yani mülküne ve bir tarafdan Kali bt. Laleka nâm Nasrâniyye mülküne ve bir tarafdan tarîk-i âma müntehî bir fevkānîyi ve ahırı ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile merkūm Yorgi’ye cedîd ve ceyyid râyic fi’l-vakt on üç bin yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve kabz ve tesellüm ettikden sonra semeni olan meblağ-ı mezbûrü’n-na‘t on üç bin yedi yüz akçeyi merkūm Yorgi yedinden bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm menzil-i mahdûd-ı mezkûr merkūm Yorgi’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Yorgi bi’l-muvâcehe tasdîk edicek mâ vaka‘a [4b ] gıbbe’l-ibtigā ketb olundu. Hurrire fi’l-yevmi’s-sâmin aşer min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed, Ali b. Mustafa, Süleyman b. Turgud, İbrahim Çelebi b. Mustafa, Todori [v.] Katalan, Yani [v.] Dimitri, Yorgi [v.] Şermata, Yorgi [v.] Kiryaki, Angilaki [v.] Todori, Todori [v.] Maskon, Trandafilo [v.] Şirmata, Dimitri [v.] Yani, Todori [v.] Yorgi