Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 58 Hüküm no: 18 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın samanlığını el-Hâc Ahmed b. Seydi’ye sattığı ve bedelini koyun bedelinden borcu ile takas ettikleri Havâss-ı Aliyye kazâsı müzâfâtından Terkos nâhiyesine tâbi‘ Ayazma nâm karye sâkinlerinden Ali Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb el-Hâc Ahmed b. Seydi nâm kimesne mahzarında bi’t-tav‘i’s-sâf ikrâr ve takrîr-i kelâm edip karye-i mezbûrede vâki‘ bir tarafdan Andron v. Apostol mülküne ve üç tarafdan müşterî-i mezbûr tasarrufunda olan tarla ile mahdûd bir bâb mülk samanlığı cümle tevâbi‘ ve levâhıkı ve âmme-i menâfi‘ ve merâfıkı ile merkūm el-Hâc Ahmed’e altı bin ceyyid ve cedîd râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi iştirâ ve kabz ve tesellüm ettikden sonra semeni olan meblağ-ı mezbûr altı bin akçeyi mukaddemâ mezbûr el-Hâc Ahmed’e koyun bahâsından zimmetimde olan altı bin akçe ile takās eyledik ba‘de’l-yevm zikr olunan samanlık merkūm el-Hâc Ahmed’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr el-Hâc Ahmed bi’l-muvâcehe tasdîk edicek mâ vaka‘a ketb ve imlâ olundu. Tahrîren fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: İbrahim Çelebi b. Mustafa, Musa b. Mehmed huddâm-ı mahkeme, Süleyman b. Turgud, el-Hâc Ahmed Beşe b. Mehmed Çukadâr, Ali b. Mustafa, Hüseyin b. el-Hâc Ahmed ve gayruhüm mine’l-huzzâr