Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 59 Hüküm no: 19 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. Mehmed Efendi’nin menzil ve bağını Fâtıma Hâtun bt. İsmail’e sattığı, ayrıca yedi parça tarlanın tasarruf hakkını devrettiği Mahmiye-i Kostantıniyye -humiyet ani’l-âfât ve’l-beliyye- mahallâtından Lütfi Paşa mahallesi sâkinelerinden fahrü’l-muhadderât [ve] zahrü’l-muvakkarât Râbia Hâtun bt. el-merhûm eş-Şeyh Mehmed Efendi tarafından bey‘ ve tefvîz-i âti’l-beyânı ikrâr ve kabz-ı semene vekîl olup hasm-ı şer‘î-i câhid mahzarında mezbûrenin zâtını ma‘rifet-i şer‘iyye ile ârifân olan Halil Çelebi b. Osman ve Ahmed b. Mehmed şehâdetleri ile şer‘an vekâleti sâbite olan zevci fahrü’l-eşbâh Kadri Çelebi b. Hasan meclis-i şer‘-i hatîr-i lâzımü’t-tevkīrde işbu râfi‘at-i hâze’l-kitâb Fâtıma Hâtun bt. İsmail tarafından ikrâr-ı âti’l-beyânı tasdîke vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite olan zevci fahr-i erbâbü’t-tahrîr ve’l-kalem zahr-ı ashâbü’t-takrîr ve’r-rakam Ali Çelebi b. Yusuf mahzarında bi’l-vekâle ikrâr ve takrîr-i kelâm edip zevcem ve müvekkilem mezbûre Râbia Hâtun’un akd-i âtî sudûruna değin silk-i mülk-i sahîhimde münselik ve münharit olan emlâk ve arâziden Havâss-ı Aliyye kazâsı müzâfâtından Terkos nâhiyesine tâbi‘ Azadlı nâm karyede vâki‘ etrâfı zahrü’l-eşbâh İbrahim Efendi mülkleri ve tarîk-i âm ile mahdûd iki bâb fevkānî ve iki bâb tahtânî odaları ve altında ahırı ve samanlığı ve fevkānî odalar ortasında vâki‘ dört gözlü anbarı ve fırını ve iki bi’r-i mâyı ve eşcâr-ı müsmire ve gayr-ı müsmireyi hâvî bahçeyi ve bağı müştemil menzili ve yine bir tarafdan Rıdvan b. Ebûbekir bağına ve bir tarafdan nalband Mehmed bağına ve bir tarafdan Mustafa b. Abdullah bağına ve bir tarafdan müvekkile-i mezbûre tarlasına müntehî tahmînen üç dönüm ve bir kıt‘a mülk bağı cümle tevâbi‘ ve levâhıkı ve âmme-i menâfi‘ ve merâfıkı ile bi-safkatin vâhidetin müvekkile-i mûmâ-ileyhâ Fâtıma Hâtun’a seksen bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi minvâl-i muharrer üzre iştirâ ve kabz ve tesellüm ettikden sonra yine karye-i mezbûre sınırı dâhilinde vâki‘ etrâfı Şeyhülislâm ve Müfti’l-enâm Ebû Said Efendi hazretleri tasarruflarında olan tarla ve Simo nâm zimmî tarlası ile mahdûd Toşod v. Kaya tarlası demekle ma‘rûf bir kıt‘a tarla ve yine etrâfı müşârün-ileyh Efendi hazretleri tarlası ve tarîk-i âm ile mahdûd gölcük tarlası demekle ma‘rûf bir kıt‘a tarla ve yine cevânibi müşârün-ileyh Efendi hazretleri ve İbrahim Ağa ve Murad [5a ] tarlaları ile mahdûd ve fındıklı tarla demekle ma‘rûf bir kıt‘a tarla ve yine karye-i mezbûre karşısında vâki‘ etrâfı Sinan Çavuş tarlaları ile mahdûd bir kıt‘a tarla ve karye-i mezbûre kurbunda vâki‘ İbrahim Ağa ve Turan Beşe tarlaları ile mahdûd bir kıt‘a tarla ve Harâmîderesi’nde vâki‘ etrâfı Osman Çelebi tarlaları ile mahdûd Çatal Tarla demekle ma‘rûf bir kıt‘a tarla ve yine Harâmîderesi’nde vâki‘ etrâfı mer‘â ile mahdûd bir kıt‘a tarla ki tahmînen dört müd tohum isti‘âb eder yedi kıt‘a tarlanın hakk-ı tasarrufunu dahi sâhib-i arz ma‘rifeti[y]le merkūme Fâtıma Hâtun’a sekiz bin nakd-i mezbûrü’n-na‘t akçeye tefvîz ve ol dahi kabûl ettikden sonra mukābele-i bey‘ ve tefvîzde olan cem‘an seksen sekiz bin cedîd ve ceyyid râyic fi’l-vakt akçeyi vekâletim hasebiyle müvekkileme îsâl için müvekkile-i merkūme Fâtıma Hâtun yedinden bi’t-tamâm ve’l-kemâl ahz u kabz eyledim, ba‘de’l-yevm zikr olunan menzil ve bağ merkūme Fâtıma Hâtun’un mülk-i müşterâ-yı sarîhidir ve mârrü’z-zikr yedi kıt‘a tarla dahi mersûmenin mülk-i müfavvazıdır sâir emsâli tasarrufu gibi mutasarrıf olsun dedikde vekîl-i mezbûr Kadri Çelebi’nin vech-i mübeyyen üzre cârî ve sâdır olan ikrâr ve takrîrini vekîl-i mersûm Ali Çelebi bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt [ve] imlâ olundu. Hurrire fi’l-yevmi’l-ışrîn [min şehri] Rebî‘ilevvel li sene erba‘a ve hamsîn ve elf. Şuhûdü’l-hâl: Fahrü’l-eimme Halil Efendi b. İbrahim, Şaban Efendi b. ( ) el-Kâtib, Hasan Efendi b. ( ) el-Kâtib, Hasan Ağa b. Ali Ağa, Hüseyin Çelebi b. Osman, Halil Çelebi b. Osman, Fahrü’l-eşbâh Ahmed Bey b. Mehmed Odabaşı, Mehmed Beşe b. ( ) er-Râcil, Halil Efendi b. Mahmud, Mahmud b. Abdullah, Ramazan b. İbrahim, Hüseyin Çelebi, Bâli [b.] Abdullah ve gayruhüm mine’l-hâzırîn