Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 60 Hüküm no: 20 Orijinal metin no: [5a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Ferhad’ın Seyyâre bt. Abdullah adlı Rus asıllı câriyesini azat ettiği Medîne-i Ebâ Eyyûb el-Ensârî -radiyallâhü te‘âlâ Rabbühü’l-Bârî- mahallâtından Câmi‘-i Kebîr mahallesinde sâkine zahrü’l-muvakkarât annesi Âişe Hâtun bt. Ferhad nâm hâtun kıbelinden ikrâr ve i‘tâk ve tahrîr-i âti’z-zikre vekîl olup vekâleti müvekkileyi ma‘rifet-i şer‘iyye ile ârifân olan es-Seyyid Ahmed Çelebi b. el-merhûm Sinan Efendi ve Mehmed Çelebi b. Mustafa nâm kimesneler şehâdetleriyle sâbite olan fahrü’l-akrân İsmail Çelebi b. Rüstem nâm kimesne meclis-i şer‘-i şerîfde -Allahü te‘âlâ tağyîr ve tahrîfden korusun- ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf edip müvekkile-i mezbûre kendiye rıkkıyetini mu‘terife olan hâmilet-i hâze’l-kitâb işbu uzun boylu, elâ gözlü, açık kaşlı, sarışın, boynunda siyah beni olan Rûsiyyetü’l-asl Seyyâre bt. Abdullah nâm câriyesi ve memlûkesini hasbeten lillâhi’l-aliyyi’l-azîm ve taleben li merzâti’r-Rabbi’r-rahîm Nebiyyü’l-muhtârın -aleyhi salavâtullâhi’l-meliki’l-gaffâr- "Men a‘taka rakabeten mü’mineten a‘takallâhu bi-külli uzvin minhâ uzven minhü mine’n-nâr / Kim bir mü’min köleyi âzâd ederse Allah da onun her bir uzvu için kendisinin bir uzvunu ateşden âzâd eder" kavliyle amel ederek i‘tâk ve tahrîr-i sahîh-i şer‘î ile i‘tâk ve tahrîr etti dedi dedikde câriye-i mezbûre dahi sâir harâir-i asliyyât gibi lehlerinde olan şey lehinde ve aleyhlerinde olan şey de aleyhinde olmak üzre hürre olup üzerinde mevâlî için utekā üzerinde şer‘an sâbit olan hakk-ı velâdan gayrı hiçbir kimesnenin hakkı kalmamağın [tahrîr olundu]. Cerâ zâlike fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Halil Çelebi b. Mehmed er-Râcil, Ahmed Çelebi b. Zülfikār, Mustafa Halîfe b. Abdullah, İsmail Bey b. Mehmed, İbrahim Çelebi b. Mustafa, Ali Beşe b. Mustafa, el-Hâc Ahmed Beşe Çukadâr, Mustafa Çelebi Hanımzâde ve gayruhüm mine’l-huzzâr