Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 61 Hüküm no: 21 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstirati v. Valako’nun menzilini ve bağ hisselerini Petro v. Pahso’ya sattığı ve tasarrufunda bulunan sekiz parça tarlanın tasarruf hakkını devrettiği Vilâyet-i Rumeli’nde Görice kazâsına tâbi‘ Polini nâm karye sâkinlerinden İstirati v. Valako nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Petro v. Pahso nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Zotko v. Todori mülküne müntehî ve bir tarafdan Tamko v. Duka mülküne ve bir tarafdan Matro v. Maşuşu mülküne müntehî bir bâb beyt-i süflîyi ve eşcâr-ı müsmire ve gayr-ı müsmireyi hâvî bahçeyi müştemil mülk menzilden ve yine karye-i mezbûre bağları dâhilinde Hacı nâm mevzi‘de vâki‘ bir tarafdan [5b ] Kosta v. Papa bağına ve bir tarafdan Petko v. Martin bağına ve bir tarafdan İstiko v. Milaço bağına ve bir tarafdan Matro v. [Ma]şuşu bağına müntehî tahmînen dört çapalık bir kıt‘a mülk bağdan ve yine Sadvanora nâm mevzi‘de vâki‘ bir tarafdan Şamlı bağına ve bir tarafdan Kara Petko bağına ve bir tarafdan Petko v. Kaşo bağına müntehî üç çapalık bir kıt‘a mülk bağdan ve yine Podraviçe nâm mevzi‘de vâki‘ bir tarafdan Dimo v. Petro bağına ve bir tarafdan Kosta v. Şano bağına ve bir tarafdan Petko v. Nedin bağına müntehî tahmînen dört çapalık bir kıt‘a bağdan nısf hisse-i şer‘iyye-i şâyi‘asını cümle tevâbi‘i ve levâhıkı ve âmme-i menâfi‘i ve merâfıkı ile bi-safkatin vâhidetin merkūm Petro’ya kırk iki riyâlî guruşa bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eyledikden sonra yine karye-i mezbûre sınırı dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen on beş keyl tohum isti‘âb eder sekiz kıt‘a tarlanın hakk-ı tasarrufunu dahi sâhib-i arz ma‘rifetiyle merkūm Petro’ya sekiz yüz nakd-i mezbûrü’n-na‘t akçeye tefvîz ve ol dahi tefevvuz ve kabûl ettikden sonra mukābele-i bey‘ ve tefvîzde olan meblağ-ı mersûm elli iki kıt‘a riyâlî guruşu merkūm Petro yedinden bi’t-tamâm ve’l-kemâl ahz u kabz edip zikr olunan mebî‘leri mahallinde kabza müşterî-i merkūmu taslît eyledim ve mârrü’z-zikr sekiz kıt‘a tarla dahi mezbûr Petro’nun mülk-i müfavvazıdır sâir emsâli gibi mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîri el-mukarru lehü’l-mezbûr Petro bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Sinan Beşe b. Abdullah, Osman Beşe b. Yusuf er-Râcil, Çalık Hasan Beşe b. Sefer er-Râcil, Hasan Beşe b. Abdullah er-Râcil, Ahmed Beşe er-Râcil, Hüsrev Beşe er-Râcil, Ali Beşe b. Mustafa er-Râcil, Mustafa Beşe b. Mehmed el-Muhtesib ve gayruhüm mine’l-hâzırîn