Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 62 Hüküm no: 22 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Estaşno v. İstemad’ın menzilini ve bağ hisselerini Kanalo v. Yani’ye sattığı ve tasarrufunda bulunan yedi parça tarlanın tasarruf hakkını devrettiği Vilâyet-i Rumeli’nde Mora sancağında Fener kazâsına tâbi‘ Vermoca nâm karye sâkinlerinden Estaşno v. İstemad nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Kanalo v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Manol v. Matyo mülküne ve bir tarafdan İstemad v. Rafu mülküne ve bir tarafdan Drako v. Kostantin mülküne ve bir tarafdan İstati v. İstemad mülküne müntehî bir bâb fevkānî ve bir bâb tahtânî beyti ve eşcâr-ı müsmire ve gayr-ı müsmireyi müştemil bahçeyi ve havluyu muhtevî olup babam mezbûr İstemad’dan müntakil ve mevrûs olup ilâ hîn-i sudûr-ı hâze’l-akd silk-i mülkümde münselik olan menzilimi ve yine karye-i mezbûre bağları dâhilinde Ferastaraki nâm mahalde vâki‘ bir tarafdan Yani v. Luksa bağına ve bir tarafdan Panayot v. Dimitri bağına ve bir tarafdan Todoraci v. Nikola bağına ve bir tarafdan dereye müntehî bir kıt‘a mülk bağı ve yine karye-i mezbûre bağları dâhilinde vâki‘ bir tarafdan Yani v. İstati bağına ve iki tarafdan İspilyot v. Dimitri tarlaları ve bir tarafdan Mavrodi v. Kozma bağına müntehî üç dip zeytin eşcârını hâvî mülk bir kıt‘a bağımı cümle tevâbi‘ ve levâhıkı ve âmme-i menâfi‘ ve merâfıkı [ile] bi-safkatin vâhidetin merkūm Kanalo’ya bin beş yüz cedîd ve ceyyid râyic fi’l-vakt akçeye bey‘-i bâtt-ı sahîh ile bey‘ ve kabz-ı semen ve ol dahi minvâl-i muharrer üzre iştirâ ve tesellüm eyledikden sonra karye-i mezbûre hudûdu dâhilinde mevâzi‘-i müteferrikada inde ahâliyi’d-diyâr her biri ma‘lûmü’l-hudûd ve’l-mikdâr tahmînen beş keyl tohum isti‘âb eder yedi kıt‘a tarlanın dahi hakk-ı tasarrufunu sâhib-i arz ma‘rifetiyle mezbûr Kanalo’ya yedi yüz nakd-i mezbûrü’n-na‘t akçeye tefvîz edip ol dahi vech-i mübeyyen üzre tefevvuz ve kabûl ettikden sonra mukābele-i bey‘ ve tefvîzde olan cem‘an iki bin iki yüz akçeyi merkūm Kanalo yedinden bi’t-tamâm ve’l-kemâl ahz u kabz edip mârrü’z-zikr mebî‘leri mahallinde kabza müşterî-i merkūmu taslît eyledim ba‘de’l-yevm zikr olunan emlâk merkūm Kanalo’nun mülk-i müşterâ-yı sarîhidir ve mârrü’z-zikr yedi kıt‘a tarla dahi mersûmun mülk-i müfavvazıdır sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Kanalo bi’l-muvâcehe tasdîk edicek mâ hüve’l-vâki‘ gıbbe’t-taleb ketb ve imlâ olundu. Hurrire fi’l-yevmi’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Süleyman b. Turgud, İbrahim Çelebi b. Mustafa, Polihroni [v.] Aleksandra, Panayot [v.] Aleksandra, Andriye [v.] Todori, İspilyot [v.] Dimitri, Yorgi [v.] Anaştaş, İştaşno [v.] Yorgi, İstati [v.] Kostantin, İstemad [v.] Yani ve gayruhüm mine’l-huzzâr