Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 63 Hüküm no: 23 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Çelebi b. Hüdâverdi’nin ayrılması nedeniyle Himmet’in yetimlerine zevcesi Nâzenin bt. Abdullah’ın vasî tayin edildiği ve yetimlere ait paraları Halil Çelebi’den teslîm aldığı Medîne-i Ebâ Eyyûb el-Ensârî -radiyallâhu anhü’l-Bârî- mahallâtından Sofular mahallesinde sâkin iken fevt olan Himmet’in verâseti zevce-i metrûkesi Nâzenin bt. Abdullah ve sulbî sagīr oğlu Mustafa ve sulbiye sagīre kızı Fâtıma ile kebîre kızı Meryem’e münhasıra olduğu şer‘an zâhir ve mütebeyyin oldukdan sonra mezbûre Nâzenin kendi tarafından asâleten ve sagīreyn-i mezbûreynin kıbel-i şer‘den mansûb vasîsi olmağın vesâyeten ve merkūme Meryem tarafından vekîl olup vekâleti ber nehc-i şer‘î sâbite olmağın vekâleten meclis-i şer‘de işbu hâmilü’l-kitâb Halil Çelebi b. Hüdâverdi mahzarında ikrâr ve i‘tirâf ve takrîr-i kelâm edip bundan akdem merkūm Halil Çelebi sagīreyn-i mezbûreynin vasiyy-i şer‘[î]leri olmağın ber mûceb-i defter-i kassâm zevcim müteveffâ-yı mersûmun muhallefâtın ahz u kabz eylemişdi el-hâletü hâzihî merkūm Halil Çelebi vesâyetden fâriğ olup kıbel-i şer‘den ben vasî olduğum ecilden makbûzu olan emvâlden cedîd ceyyid yirmi bir bin dört yüz yirmi beş râyic fi’l-vakt fıddî akçeyi mezbûr Halil Çelebi’nin yedinden vesâyet-i mahkiyem hasebiyle bi’t-tamâm ve’l-kemâl ahz u kabz edip meblağ-ı mezbûrdan mezbûr Halil Çelebi’nin zimmeti[ni] ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-ışrîn min Rebî‘ilevvel sene erba‘a ve hamsîn ve elf. Şuhûdü’l-hâl: Abdurrahman b. Mustafa el-Hammâmî, Mehmed b. Abdullah, Mustafa Beşe b. Hasan, Ali Beşe b. ( ) el-Muhzır, İbrahim Çelebi el-Muhzır, Baba Süleyman el-Muhzır ve gayruhüm mine’l-hâzır[în]