Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 64 Hüküm no: 24 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Ali ile el-Hâc Cafer b. Mehmed’in birbirlerine karşılıklı olarak mülk menzillerini sattıkları (takas ettikleri) Medîne-i Hazret-i Ebâ Eyyûb el-Ensârî mahallâtından Câmi‘-i Kebîr mahallesinde sâkine zahrü’l-muvakkarât Âişe Hâtun bt. Ali meclis-i şer‘-i hatîr-i lâzımü’t-tevkīrde işbu hâmil-i hâzihi’r-rakīm fahrü’l-akrân el-Hâc Cafer b. Mehmed nâm râcil mahzarında bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülkümde münselik ve münharit olan emlâkden mahalle-i mezbûre[de] vâki‘ bir tarafdan ba‘zan Abdurrahman Çelebi ve ba‘zan Âbide Hâtun mülküne ve bir tarafdan ba‘zan Âişe Hâtun bt. Yahya ve ba‘zan Mehmed Beşe b. ( ) mülküne ve bir tarafdan Usta Kılıç b. Abdullah mülküne müntehî iki bâb fevkānî ve iki bâb tahtânî beyti ve iki sofayı ve dehlizini ve hâricde fevkānî bir odayı ve sokak kapısına karîb fevkānî ve tahtânî kenîfi ve önünde fevkānî sundurmayı ve bi’r-i mâyı ve münferiden iki fevkānî odayı ve tahtında ahırı ve kenîfi ve zât-ı eşcâr-ı müsmire ve gayr-ı müsmire hadîka ve muhavvatayı müştemil mülk menzili bi-tarîki’l-mukāyazati’ş-şer‘iyye merkūm el-Hâc Cafer’in yine mahalle-i mezbûre[de] vâki‘ bir tarafdan Mehmed Çelebi b. Abdullah mülkü ve bir tarafdan Âişe Hâtun bt. Mahmud mülkü ve bir tarafdan Abdurrahma[n] b. Abdülmennân sâkin olduğu vakıf menzil ve bir tarafdan tarîk-i âm ile mahdûd iki bâb fevkānî beyti ve ahırı ve bi’r-i mâyı ve kenîfi ve eşcâr-ı müsmire ve gayr-ı müsmireyi hâvî hadîkayı ve muhavvatayı müştemil mülk menzil ile üç yüz yetmiş kıt‘a riyâlî guruşa bey‘ edip her birimiz kabz-ı müşterâ ve teslîm-i mebî‘ eyledik ba‘de’l-yevm mahalle-i mezkûre[de] vâki‘ hudûd-ı mezkûre ile mahdûd olup merkūm el-Hâc Cafer’in mülkü olan menzil benim mülküm olup ve yine mahalle-i mezkûre[de] vâki‘ hudûd-ı sâlifü’l-beyân ile mahdûd olup benim mülküm olan menzil merkūm el-Hâc Cafer’in mülküdür, keyfe mâ yeşâ’ ve hasbe mâ yürîd mutasarrıf olsun dedikde mukırra-i mezbûre Âişe Hâtun’un vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr el-Hâc Cafer bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’l-ışrîn şehri Rebî‘ilevvel min şühûri sene erba‘a ve hamsîn ve elf. Şuhûdü’l-hâl: Kıd[v]etü’s-sâlikîn eş-Şeyh Nasrullah Efendi el-vâ‘iz bi-Câmi‘-i’l-Kebîr, zübdetü’l-müderrisîni’l-kirâm Avnullah Efendi, fahrü’l-emsâl Ahmed Çelebi b. Hüsrev el-Kâtib, es-Seyyid Ahmed Çelebi b. el-merhûm es-Seyyid Bostan Efendi, Abdüllatîf Efendi [b.] eş-Şeyh Nasrullah Efendi, Şerîfezâde Hüseyin Efendi el-İmâm, Mehmed b. Osman, Mustafa Çelebi b. Hasan el-Hammâmî, Mustafa b. İdris, Mustafa Çelebi b. Veli, İbrahim Çelebi b. Mehmed, Mehmed b. İsmail, Hüseyin Çelebi b. Abdullah el-Hammâmî, Mustafa Bey b. Nasuh el-Cündî, Veli Bey b. Mirza el-Bevvâbü’s-sultânî ve gayruhüm mine’l-hâzırîn