Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 65 Hüküm no: 25 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryazi v. Dimitri’nin bağını Avram v. Yani’ye sattığı Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Ayayorgi nâm karye sâkinlerinden Kiryazi v. Dimitri nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Avram v. Yani nâm zimmî mahzarında bi’t-tav‘ ve’r-rızâ ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olan emlâkimden karye-i mezbûre kurbunda Yorince nâm mevzi‘de vâki‘ bir tarafdan Dimo v. Tedarnaku bağına ve bir tarafdan Panayot v. Zumo bağına ve iki tarafdan tarîk-i âma müntehî eşcâr-ı müsmire ve gayr-ı müsmireyi ve bir mikdâr arz-ı hâliyeyi hâvî tahmînen üç dönüm bir kıt‘a mülk bağımı cümle tevâbi‘ ve levâhıkı ve âmme-i menâfi‘ ve merâfıkı ile mesfûr Avram’a üç bin cedîd ceyyid akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm bağ-ı mahdûd-ı mezkûr merkūm Avram’ın mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Avram [bi]’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali b. Mustafa el-Muhzır, Süleyman b. Turgud, Musa b. Mustafa, Rizo v. Kerhis, Rizo v. Yani, Şiro v. Tanaş, Harito v. Yani, Polihroni v. Yani, Şiro v. Panayot, Keraçşo v. Tanaş, Dimo v. İsteryo, Astol v. Yakomi