Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 65 Hüküm no: 26 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Ahmed’in bazı eşyalarını hastalığı sırasında kendisine bakan Mustafa b. Mahmud’a verdiği
Mahmiye-i Kostantıniyye -humiyet ani’l-âfât ve’l-beliyye- mahallâtından Üsküplü mahallesi sâkinelerinden Fâtıma Hâtun bt. Ahmed meclis-i şer‘-i hatîr-i lâzımü’t-tevkīrde işbu hâmilü’l-kitâb Mustafa b. Mahmud mahzarında takrîr-i kelâm edip li eb karındaşım olup târih-i kitâbdan on ay mukaddem medîne-i Ebâ Eyyûb el-Ensârî -aleyhi rahmetü’l-Bârî- [mahallâtından] İslâm Bey mahallesinde sâkin iken fevt olan Mehmed b. Ahmed nâm müteveffânın verâseti bana münhasıra olmuşken müteveffâ-yı mezbûrun muhallefâtından işbu hâzır bi’l-meclis olan mâ’î çuka kürdiye ve iki nohudî bogasi entari kaftan ve bir bâzincânî zennâne atlas köhne kaftan ve bir tilki parçası kürk ve bir beyaz bogasi sâde mezbûr Mustafa’nın yedinde mazbût olup hâlen vâzı‘ü’l-yed ve mutasarrıfdır ne keyfiyyet ile tasarruf eder suâl olunup alıverilmesi matlûbumdur dedikde gıbbe’s-suâl [ve] akībe’l-istintâk mezbûr Mustafa cevâbında fi’l-hakīka müteveffâ-yı mezbûr Mehmed târih-i mezkûrda ishal marazına mübtelâ olup sâhib-i firâş oldukda bana bir hoşça bir hizmet ve timar eyle zikr olunan eşyâyı sana vereyin deyû hâl-i hayâtında [ve] kemâl-i akl ve idrâk ile muttasıf iken hizmetim mukābelesinde bana teslîm eyledi dedikde merkūme Fâtıma Hâtun vech-i mübeyyen üzre merkūm Mustafa’nın kelimât-ı meşrûhasını bi’l-müşâfehe tasdîk etmeğin merkūme Fâtıma Hâtun mu‘ârazadan men‘ birle mâ vaka‘a ketb ve imlâ olundu. Hurrire fi’l-yevmi’r-râbi‘ ve’l-ışrîn min şehri Rebî‘ilevvel li sene erba‘a ve hamsîn ve elf.
Şuhûdü’l-hâl: Mahmud Halîfe b. Hasan el-İmâm, Hüseyin Beşe b. Yusuf, Mehmed b. Bayram, Ahmed b. Mehmed ve gayruhüm mine’l-huzzâr
|