Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 66 Hüküm no: 27 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Mavrodi’nin babası öldüğünde çobanlığını yapan Yani v. İstati’den elindeki koyunların bedelini talep ettiği ve ödemesine hükmedildiği Vilâyet-i Rumeli’nde Yenişehir müzâfâtından Kuhistân nâhiyesine tâbi‘ Ayadıranda nâm karye sükkânından Yani v. Mavrodi nâm zimmî meclis-i şer‘-i hatîr-i lâzımü’t-tevkīrde çoban tâifesinden Yani v. İstati muvâcehesinde üzerine takrîr-i da‘vâ edip târih-i kitâbdan yirmi üç sene mukaddem babam mezbûr Mavrodi mürd oldukda çobanı olmağın üç yüz re’s koyununa bi-gayr-ı vech-i şer‘î vaz‘-ı yed eylemişdir suâl olunup alıverilmesi matlûbumdur dedikde gıbbe’l-istintâk mezbûr Yani fi’l-vâki‘ müdde‘î-i mezbûrun babası Mavrodi mürd oldukda ben koyununun çobanı olmağın havfen mine’z-ziyâ‘ üç yüz re’s koyununu beher re’s yüz yirmişer akçeye olmak [7a ] üzre cem‘an otuz altı bin akçeye işbu hâzır bi’l-meclis olan Pîrî Beşe b. Abdi’ye bey‘ edip semeni olan meblağ-ı mersûm zimmetinde bâkīdir suâl olunsun dedikde gıbbe’s-suâl akībe’l-inkâr çoban-ı mezbûr Yani’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf eyledikde merkūm Pîrî Beşe dahi alâ mâ hüve’l-mes’ûl half billâhi te‘âlâ eylemeğin çoban-ı mezbûr ber mûceb-i ikrârihî meblağ-ı mezbûrun edâsıyla hükm olunup işbu vesîka-i enîka alâ mâ hüve’l-hakīka ber sebîl-i temessük ketb ve imlâ olunup men lehü’t-taleb yedine vaz‘ olundu. Hurrire fi’l-yevmi’r-râbi‘ ve’l-ışrîn min şehri Rebî‘ilevvel li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe b. Mustafa el-Muhzır, Süleyman b. Turgud, Musa b. Mustafa ve gayruhüm mine’l-huzzâr