Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 69 Hüküm no: 33 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe, Ali Bey ve Süleyman Beşe’nin menzillerini Hasan Beşe b. Cafer ile zevcesi Belkıs bt. Abdullah’a sattıkları Medîne-i Ebâ Eyyûb el-Ensârî -radiye anhu Rabbühü’l-Bârî-’de Çavuş Kasım mahallesi sükkânından Mehmed Beşe ve Ali Bey ve Süleyman Beşe evlâd-ı Mehmed meclis-i şer‘-i kavîm-i vâcibü’t-tekrîmde işbu râfi‘ü’l-vesîka Hasan Beşe b. Cafer ve zevcesi Belkıs bt. Abdullah muvâcehelerinde her biri bi’t-tav‘ ikrâr ve i‘tirâf edip zikri âtî akdin sudûruna değin her birimizin ale’l-iştirâki’s-seviy silk-i mülk ve tasarrufumuzda ve taht-ı yedimizde münselik ve muntazam ve münharit hakkımız olup mahalle-i mezbûrede vâki‘ bir tarafı Rahim[e] Hâtun bt. Süleyman mülkü ve bir tarafı Fâtıma bt. Ali mülkü ve bir tarafı ba‘zan Zıhgîrcizâde evlâdı mülkleri ve ba‘zan Süleyman Beşe b. İlyas mülkü ve taraf-ı âhiri tarîk-i âm ile mahdûd üç bâb tahtânî odayı ve bir sofayı ve ahırı ve bir su kuyusunu ve muhavvata-i zât-ı eşcâr-ı müsmire ve gayr-ı müsmireyi müştemil cemî‘ mülk-i mezbûrdan menzilimizi cemî‘ hukūk ve merâfıkı ile mezbûrân Hasan Beşe ve zevcesi Belkıs’a bey‘-i kat‘î ile her birimiz hissemizi tâmmü’l-vezn sahîhü’l-ayâr cârî fî cemî‘i’d-diyâr ve’l-ahsâr fıddî nakd-i râyic fi’l-vakt yüz elli beş kıt‘a riyâlî guruş-ı kebîre bey‘-i kat‘î ile bey‘ ve teslîm eyledik onlar dahi ale’l-iştirâki’s-seviy iştirâ ve tesellüm [ve] kabûl eylediklerinden sonra semen-i mezbûr yüz elli beş kıt‘a mezbûrü’n-na‘t guruşu yedlerinden tamâmen ahz u kabz eyledik ba‘de’l-yevm menzil-i mezbûr müşteriyân-ı mezbûrânın iştirâk-i seviy üzre mülk-i müşterâları ve hakk-ı sarîhleridir keyfe mâ yeşâ[’ân] ve hasbe mâ yürîdâ[n] mutasarrıfân olsunlar dediklerinde mukırr-ı mezbûrûnun vech-i mübeyyen üzre olan ikrâr-ı meşrûhlarını el-mukarru lehüma’l-merkūmân vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Fî evâhiri Saferi’l-hayr li sene erba‘a ve hamsîn ve elf. Şuhûdü’l-hâl: Hüseyin Efendi b. ( ) el-İmâm, İbra[him] Beşe b. Mustafa, Abdi b. Mehmed, İvaz b. Mustafa, İlyas b. Süleyman, Ali Çelebi b. İbrahim, el-Hâc Hasan b. ( ), nalçacı Mustafa ve gayruhüm