Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 70 Hüküm no: 34 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın menzilini torunu İsmihân bt. Mahmud’a hibe ettiği Havâss-ı Aliyye kazâsı nevâhîsinden nefs-i kasaba-i Hasköy’de Abdüsselâm mahallesinde sâkine Fâtıma bt. Abdullah mahfil-i kazâda kendinin sadriye kebîre kızı Âişe nâm hâtunun sadriye kebîre kızı işbu râfi‘ü’l-vesîka İsmihân bt. Mahmud tarafından ikrârı âti’l-beyânı tasdîke vekîl olup nehc-i şer‘î üzre alâ vechi’l-hasm vekâlet-i sâbite olan mezkûre İsmihân’ın zevci Süleyma[n] Beşe b. Hamza muvâcehesinde bi’t-tav[‘] ikrâr ve i‘tirâf edip beyân-ı âtî hibenin sudûruna değin silk-i mülk ve tasarrufumda ve taht-ı yedimde münsecim hakkım olup mahalle-i mezbûrede vâki‘ bir tarafı Mustafa b. Mehmed mülkü ve bir tarafı Ali b. Abdullah mülkü ve bir tarafı Mustafa Ağa b. Abdullah mülkü ve taraf-ı âharı tarîk-i âm ile mahdûd iki bâb tahtânî odayı ve havluyu ve kenîfi ve su kuyusunu müştemil cemî‘ mülk menzilimi cemî‘ hukūku ve merâfıkı ile müvekkile-i mezkûre İsmihân’a hibe-i sahîha-i şer‘iyye ile hibe ve temlîk ve teslîm eyledim ol dahi ba‘de’t-tahliyyeti’ş-şer‘iyye meclis-i hibede ittihâb ve kabûl eyledi, ba‘de’l-yevm zikr olunan menzili mezkûre İsmihân’ın mülk-i mevhûbudur keyfe mâ yeşâ’ ve hasbe mâ türîd mutasarrıfe olsun dedikde mukırra-i mezkûrenin vech-i mübeyyen üzre olan ikrâr-ı meşrûhunu vekîl-i mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Mustafa Halîfe b. ( ) el-İmâm, Mehmed Beşe b. Abdullah, Ali Çelebi b. Yusuf, Hüseyin b. Bâli, Şaba[n] b. Hızır, Sinan b. Muslu, Ali Beşe b. Mustafa, Hüseyin b. Ali ve gayruhüm [mine’l-huzzâr]