Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 78 Hüküm no: 45 Orijinal metin no: [9b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Mehmed b. İbrahim’in Mankola’yı hançer ile yaraladığı Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de Çömlekçiler çarşısı’nda vâki‘ Hamzâvî Beyzâde fırını demekle meşhûr fırında hâlen reis-i habbâz olan el-Hâc Ali b. Ahmed meclis-i şer‘-i kavîm-i vâcibü’t-tekrîmde takrîr-i kelâm ve bast-ı merâm edip işbu târih-i kitâb gecesi beyne’l-işâeyn Kara Mehmed b. İbrahim nâm kimesne sekrânen gelip fırın-ı mezbûr içinde sâkin olan zimmîlerden hamr taleb edip hamrımız yokdur dediklerinde Mankola nâm habbâz zimmînin sağ elinin parmakları arasına elinde olan uryan hançer ile urup mecrûh eylemişdir, kıbel-i şer‘den üzerine varılıp keşf ve tahrîr olunması matlûbumdur dedikde medîne-i mezbûrede hâlen âbık nâibi olan Receb Efendi b. Abdi irsâl olunup ol dahi zeyl-i kitâbda isimleri mastûr olan [10a ] müslimîn ile zikr olunan fırına varıp mecrûh-ı mezbûr Mankola’nın cerâhatini keşf ve müşâhede edip hakīkat-i hâli mezbûr Mankola’dan istihbâr eyledikde vakt-i mezbûrda merkūm Kara Mehmed sekrânen gelip beni hançer ile sağ elimin parmakları arasında urup mecrûh eyledi dediğini mevlânâ-yı mezbûr mahallinde ketb ü tahrîr, ba‘dehû meclis-i şer‘a gelip alâ vukū‘ihî inbâ ve takrîr etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Saferi’l-hayr li sene erba‘a ve hamsîn ve elf. Şuhûdü’l-hâl: Seyyid Mehmed b. Ahmed, Osman b. Abdullah, Mehmed Beşe b. ( ) er-Râcil, Mustafa Çelebi b. Seyyid Zeynelâbidin, Hasan Bey b. Mehmed el-Cündî, Mustafa Çelebi b. Seyyid ( ), İbrahim b. Hasan, Mahmud Bey b. Mehmed el-Cündî